കളിക്കുന്നതിടെ അയല്‍വാസിയുടെ വീട്ടില്‍ വെള്ളം കുടിക്കാനെത്തി; പന്ത്രണ്ടുകാരിയെ പീഡിപ്പിച്ച് ഗര്‍ഭിണിയാക്കിയ 75കാരന്‍ അറസ്റ്റില്‍: കുട്ടിയെ ഇയാള്‍ പലതവണ പീഡിപ്പിച്ചതായി റിപ്പോര്‍ട്ട്
പന്ത്രണ്ടുകാരിയെ പീഡിപ്പിച്ച് ഗര്‍ഭിണിയാക്കിയ 75കാരന്‍ അറസ്റ്റില്‍
കോഴിക്കോട്: 12 വയസ്സുകാരിയെ പീഡിപ്പിച്ച് ഗര്‍ഭിണിയാക്കിയ കേസില്‍ 72 വയസ്സുകാരനെ പോലിസ് അറസ്റ്റ് ചെയ്തു. താമരശ്ശേരി പൊലീസ് സ്റ്റേഷന്‍ പരിധിയില്‍ നടന്ന സംഭവത്തില്‍ കുട്ടിയുടെ സമീപവാസിയെയാണ് പോലിസ് അറസ്റ്റ് ചെയ്തത്. വയറുവേദനയെ തുടര്‍ന്ന് മേയ് 15ന് കുട്ടിയെ ആശുപത്രിയില്‍ എത്തിച്ചപ്പോഴാണ് കുട്ടി ഗര്‍ഭിണിയാണെന്ന വിവരം അറിഞ്ഞത്. മെഡിക്കല്‍ കോളജ് ആശുപത്രിയില്‍ എത്തിച്ച പെണ്‍കുട്ടിയുടെ സ്ഥിതി സംബന്ധിച്ച് ഡോക്ടര്‍ നല്‍കിയ വിവരത്തെത്തുടര്‍ന്നാണ് പൊലീസ് കേസെടുത്തത്.
തുടര്‍ന്ന് കുട്ടിയോട് വിവരം ചോദിച്ചപ്പോഴാണ് 72കാരനെ കുറിച്ചുള്ള വിവരം ലഭിച്ചത്. പ്രതിയുടെ വീടിനു സമീപത്തെ ഒഴിഞ്ഞ പറമ്പില്‍ പെണ്‍കുട്ടി കളിക്കാന്‍ പോകും. ദാഹിക്കുമ്പോള്‍ ഇടയ്ക്ക് ഇയാളുടെ വീട്ടില്‍ വെള്ളം കുടിക്കാനായി എത്താറുമുണ്ടായിരുന്നു, ഈ അവസരം മുതലെടുത്ത് ഇയാള്‍ പെണ്‍കുട്ടിയെ പീഡിപ്പിച്ചുവെന്നാണ് മൊഴിയില്‍ വ്യക്തമായത്. പ്രതിയുടെ ഭാര്യ കൂലിപ്പണിക്ക് പോകാറുള്ളതിനാല്‍ വീട്ടില്‍ ആരും ഉണ്ടാവാറില്ല. ഈ തക്കം നോക്കിയാണ് പീഡനം നടന്നത്. ഇയാളുടെ മക്കളുടെ വിവാഹം കഴിഞ്ഞതാണ്. പലതവണ ഇയാള്‍ പീഡിപ്പിച്ചതായാണ് വിവരം.
പെണ്‍കുട്ടിയുടെ മൊഴി സ്ഥിരീകരിക്കാന്‍ എഴുപത്തിരണ്ടുകാരനെ ഡിഎന്‍എ പരിശോധനക്ക് വിധേയനാക്കിയിരുന്നു. രണ്ടു മാസത്തിനു ശേഷം ഡിഎന്‍എ ഫലം വന്നതോടെയാണ് അറസ്റ്റ് രേഖപ്പെടുത്തിയത്. താമരശ്ശേരി ജുഡീഷ്യല്‍ ഒന്നാം ക്ലാസ് മജിസ്ട്രേട്ട് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.