ബെസ്റ്റിയെ ചൊല്ലിയുളള തര്‍ക്കം; ക്ലാസ് റൂമില്‍ സിനിമ സ്‌റ്റൈലില്‍ ഏറ്റുമുട്ടി പ്ലസ് വണ്‍ വിദ്യാര്‍ത്ഥികള്‍; അടിപിടിയുടെ ദൃശ്യങ്ങള്‍ പകര്‍ത്തി സഹപാഠികള്‍; ടെലഗ്രാം ഗ്രൂപ്പുകളില്‍ പ്രചരിച്ചതോടെ വിളിച്ചുവരുത്തി പൊലീസ്
ബെസ്റ്റിയെ ചൊല്ലിയുളള തര്‍ക്കം; ക്ലാസ് റൂമില്‍ സിനിമ സ്‌റ്റൈലില്‍ ഏറ്റുമുട്ടി പ്ലസ് വണ്‍ വിദ്യാര്‍ത്ഥികള്‍
കൊച്ചി: ബെസ്റ്റിയെ ചൊല്ലിയുള്ള തര്‍ക്കത്തിനൊടുവില്‍ ക്ലാസ് റൂമില്‍ പ്ലസ് വണ്‍ വിദ്യാര്‍ത്ഥികള്‍ തമ്മില്‍ ഏറ്റുമുട്ടി. അടിപിടിയുടെ ദൃശ്യങ്ങള്‍ പകര്‍ത്താന്‍ കൂട്ടുകാരെ ചുറ്റും നിര്‍ത്തിയ ശേഷമാണ് രണ്ട് വിദ്യാര്‍ത്ഥികള്‍ തമ്മിലടിച്ചത്. ഇതിന്റെ ദൃശ്യങ്ങള്‍ സോഷ്യല്‍ മീഡിയയില്‍ പ്രചരിച്ചതോടെ വിഷയത്തില്‍ പൊലീസും ഇടപെട്ടു. വിദ്യാര്‍ത്ഥികളെയും ഇവരുടെ രക്ഷിതാക്കളെയും പൊലീസ് സ്റ്റേഷനിലേക്ക് വിളിച്ചുവരുത്തി.
കൊച്ചിയിലെ ഒരു സ്‌കൂളിലാണ് സംഭവം നടന്നത്. ബെസ്റ്റിയായ പെണ്‍കുട്ടിയെ ചൊല്ലിയാണ് തര്‍ക്കമുണ്ടായത്. ഇതിലൊരാളുമായി പെണ്‍കുട്ടി പിണങ്ങിയിരുന്നു. എന്നിട്ടും ആ വിദ്യാര്‍ത്ഥി പെണ്‍കുട്ടിയോട് സംസാരിച്ചു. ഇത് മറ്റേ വിദ്യാര്‍ത്ഥിക്ക് ഇഷ്ടമായില്ല. തുടര്‍ന്ന് രണ്ട് വിദ്യാര്‍ത്ഥികളും തമ്മില്‍ തര്‍ക്കമായി. ഒടുവില്‍ തല്ലിത്തീര്‍ക്കാമെന്ന് പറഞ്ഞു.വീഡിയോയെടുക്കാന്‍ സഹപാഠികളെ ചുറ്റും നിര്‍ത്തി. തുടക്കത്തില്‍ ഇവര്‍ വിദ്യാര്‍ത്ഥികളെ പ്രോത്സാഹിപ്പിക്കുകയാണ്. ഒടുവില്‍ അടിപിടി രൂക്ഷമായതോടെ ഇവരെ പിടിച്ചുമാറ്റാന്‍ ഒരു സഹപാഠി ആവശ്യപ്പെടുകയായിരുന്നു.
സംഭവത്തിന്റെ ദൃശ്യം വിദ്യാര്‍ത്ഥികള്‍ അവരുടെ ടെലഗ്രാം ഗ്രൂപ്പുകളില്‍ ഷെയര്‍ ചെയ്തു. ഇതിനുപിന്നാലെയാണ് ദൃശ്യങ്ങള്‍ സോഷ്യല്‍ മീഡിയയില്‍ പ്രചരിച്ചത്. ആരെയും ഭയപ്പെടുത്തും വിധം തമ്മിലടിക്കുന്ന വിദ്യാര്‍ഥികളുടെ ദൃശ്യങ്ങള്‍ നവമാധ്യമങ്ങളില്‍ പ്രചരിച്ചതോടെ വിഷയത്തില്‍ പൊലീസ് ഇടപെടുകയായിരുന്നു. വിദ്യാര്‍ത്ഥികളോട് രക്ഷിതാക്കളുമായി സ്റ്റേഷനിലെത്താന്‍ ആവശ്യപ്പെടുകയായിരുന്നു.