ഇന്ഷുറന്സ് തുകയ്ക്കായി ഭാര്യയെയും മക്കളെയും കൊലപ്പെടുത്തിയ കേസ്; വര്ഷങ്ങള്ക്ക് ശേഷം പ്രതി പിടിയില്
മലപ്പുറം: ഇന്ഷുറന്സ് തുക തട്ടിയെടുക്കുന്നതിനായി ഭാര്യയെയും രണ്ട് പിഞ്ചുമക്കളെയും ക്രൂരമായി കൊലപ്പെടുത്തിയ കേസ്സിലെ പ്രതി വര്ഷങ്ങള്ക്ക് ശേഷം പിടിയിലായി. അരീക്കോട് വാവൂര് സ്വദേശി മുഹമ്മദ് ശരീഫിനെയാണ് കര്ണാടകയില് നിന്ന് പോലീസ് പിടികൂടിയത്. വര്ഷങ്ങളായി ഒളിവില് കഴിഞ്ഞിരുന്ന പ്രതിയെ രഹസ്യവിവരത്തിന്റെ അടിസ്ഥാനത്തില് നടത്തിയ നീക്കത്തിനൊടുവിലാണ് പോലീസ് വലയിലാക്കിയത്.
2012 ജൂലൈ 21-നാണ് നാടിനെ നടുക്കിയ ഈ അരുംകൊല നടന്നത്. മുഹമ്മദ് ശരീഫ് തന്റെ ഭാര്യ ഒളവട്ടൂര് സ്വദേശി സാബിറ (21), മക്കളായ ഫാത്തിമ ഫിദ (4), ഹൈഫ (2) എന്നിവരെയാണ് ആസൂത്രിതമായി വെള്ളക്കെട്ടില് മുക്കി കൊലപ്പെടുത്തിയത്. പെരുന്നാള് വസ്ത്രങ്ങള് വാങ്ങി കോഴിക്കോട് നിന്ന് മടങ്ങുന്നതിനിടെ ടയര് പഞ്ചറായി വാഹനം അപകടത്തില്പ്പെട്ടതാണെന്നായിരുന്നു പ്രതി അന്ന് പോലീസിനോട് പറഞ്ഞിരുന്നത്.
എന്നാല്, ശരീഫിന്റെ മൊഴികളിലെ വൈരുദ്ധ്യവും സാഹചര്യ തെളിവുകളും കേന്ദ്രീകരിച്ച് പോലീസ് നടത്തിയ ശാസ്ത്രീയ അന്വേഷണത്തിലാണ് കൊലപാതക വിവരം പുറത്തുവന്നത്. സംഭവത്തിന് രണ്ട് മാസം മുന്പ് ഭാര്യയുടെ പേരില് ഇയാള് 10 ലക്ഷം രൂപയുടെ ഇന്ഷുറന്സ് പോളിസി എടുത്തിരുന്നു. ഈ തുക കൈക്കലാക്കുക എന്ന ലക്ഷ്യത്തോടെയാണ് പ്രതി ഭാര്യയെയും മക്കളെയും അപായപ്പെടുത്തിയത്.
അപകടമാണെന്ന് വരുത്തിത്തീര്ക്കാന് പ്രതി നടത്തിയ ശ്രമങ്ങള് പോലീസ് പൊളിച്ചടുക്കിയിരുന്നു. വിചാരണ വേളയിലും മറ്റും ഒളിവില് പോയ പ്രതിയെ കണ്ടെത്താന് ലുക്കൗട്ട് നോട്ടീസ് ഉള്പ്പെടെ പുറപ്പെടുവിച്ചിരുന്നു. കര്ണാടകയിലെ വിവിധ ഭാഗങ്ങളില് ഒളിവില് കഴിഞ്ഞിരുന്ന ശരീഫ് പിടിക്കപ്പെടുമെന്ന് ഉറപ്പായതോടെ പലതവണ താമസം മാറിയിരുന്നു. ഒടുവില് രഹസ്യ നിരീക്ഷണത്തിലൂടെ പ്രതിയെ അരീക്കോട് പോലീസ് സംഘം കസ്റ്റഡിയിലെടുക്കുകയായിരുന്നു.
പ്രതിയെ മലപ്പുറത്ത് എത്തിച്ച് തെളിവെടുപ്പ് പൂര്ത്തിയാക്കിയ ശേഷം കോടതിയില് ഹാജരാക്കും. ഇന്ഷുറന്സ് തുകയ്ക്ക് വേണ്ടി സ്വന്തം കുടുംബത്തെ തന്നെ ഇല്ലാതാക്കിയ ഈ കേസിലെ പ്രതിക്ക് നിയമം അര്ഹിക്കുന്ന ശിക്ഷ നല്കണമെന്ന ആവശ്യത്തിലാണ് നാട്ടുകാര്. പന്ത്രണ്ട് വര്ഷങ്ങള്ക്ക് ശേഷം പ്രതി പിടിയിലായത് പോലീസിന്റെ വലിയ നേട്ടമായാണ് വിലയിരുത്തപ്പെടുന്നത്.