ലാപ്ടോപ്പും പാസ്പോര്ട്ടും വഴിയില് ഉപേക്ഷിച്ചു സാകേത് എങ്ങോട്ടുപോയി? ക്യാമ്പസിന് തൊട്ടടുത്ത് വച്ച് അപ്രത്യക്ഷനാകല്; ബെര്ക്കലി കുന്നുകളില് അരിച്ചുപെറുക്കി പോലീസ്! ഐഐടിയില് നിന്ന് അമേരിക്കയിലെത്തിയ പ്രതിഭയ്ക്കായി തിരച്ചിലില് കൈകോര്ത്ത് ഇന്ത്യന് സോഷ്യല് മീഡിയാ കൂട്ടായ്മകളും!
ലാപ്ടോപ്പും പാസ്പോര്ട്ടും വഴിയില് ഉപേക്ഷിച്ചു സാകേത് എങ്ങോട്ടുപോയി?
കാലിഫോര്ണിയ: വിദേശത്തെ ഇന്ത്യന് വിദ്യാര്ത്ഥികളുടെ സുരക്ഷയെക്കുറിച്ച് വീണ്ടും ചര്ച്ചകള് സജീവമാകുന്നു. അമേരിക്കയിലെ കാലിഫോര്ണിയയില് ഉപരിപഠനത്തിനെത്തിയ മിടുക്കനായ ഇന്ത്യന് വിദ്യാര്ത്ഥിയെ അഞ്ച് ദിവസമായി കാണാനില്ലെന്ന ഞെട്ടിക്കുന്ന വിവരമാണ് ഇപ്പോള് പുറത്തുവരുന്നത്. കര്ണാടക സ്വദേശിയായ സാകേത് ശ്രീനിവാസയ്യ (22) എന്ന യുവാവിനെയാണ് ഫെബ്രുവരി 9 മുതല് കാണാതായത്. കാലിഫോര്ണിയ സര്വകലാശാലയിലെ കെമിക്കല് ആന്ഡ് ബയോമോളികുലാര് എന്ജിനീയറിങ് വിദ്യാര്ഥിയാണ് സാകേത്.
ക്യാമ്പസില് നിന്നും ഒരു കിലോമീറ്റര് അകലെ വെച്ചാണ് വിദ്യാര്ഥിയെ അവസാനമായി കണ്ടതെന്ന് അധികൃതര് അറിയിച്ചു. സമീപത്ത് നിന്നും പാസ്പോര്ട്ടും ലാപ്ടോപും അടങ്ങിയ ബാഗ് പിന്നീട് കണ്ടെടുത്തിരുന്നു. നിലവില് ലേക്ക് അന്സ, ബെര്ക്കലി ഹില്സ് എന്നിവ കേന്ദ്രീകരിച്ചാണ് തിരച്ചില് പുരോഗമിക്കുന്നത്. ആറടി ഉയരവും ഏകദേശം 72 കിലോ ഭാരവുമുള്ള സാകേതിന് കറുത്ത ചെറിയ മുടിയും തവിട്ട് നിറത്തിലുള്ള കണ്ണുകളുമാണുള്ളത്.
അതേസമയം, സാകേതിന്റെ തിരോധാനത്തില് ആശങ്ക അറിയിച്ച സാന്ഫ്രാന്സിസ്കോയിലെ ഇന്ത്യന് കോണ്സുലേറ്റ് വിദ്യാര്ഥിയുടെ കുടുംബവുമായും അധികൃതരുമായും ബന്ധപ്പെടുന്നുണ്ടെന്നും അറിയിച്ചു. സാകേതിനെ കണ്ടെത്താനായി സമൂഹമാധ്യമങ്ങള് വഴി നിരവധി കൂട്ടായ്മകള് പരിശ്രമിക്കുന്നുണ്ട്. നിരവധി പേര് തിരച്ചിലിനിറങ്ങുമെന്നും അറിയിച്ചിട്ടുണ്ട്.
ബംഗളൂരുവിലെ ശ്രീവാണി എജ്യുക്കേഷന് സെന്ററിലായിരുന്നു സാകേതിന്റെ സ്കൂള് വിദ്യാഭ്യാസം. ഐ.ഐ.ടി മദ്രാസില് നിന്ന് ബിരുദം പൂര്ത്തിയാക്കിയ സാകേത് ബിരുദാനന്തര ബിരുദത്തിനായാണ് യു.എസിലെത്തിയത്. ലിങ്ക്ഡ്ഇന് പ്രൊഫൈല് വിവരങ്ങളനുസരിച്ച് ഹൈപ്പര്ലൂപ്പിനായുള്ള 'മൈക്രോചാനല് കൂളിങ് സിസ്റ്റവും അതിന്റെ പ്രവര്ത്തന രീതിയും' കണ്ടുപിടിച്ച ആറംഗ സംഘത്തില് ഒരാളായിരുന്നു സാകേത്.
അതേസമയം, വിദേശത്തെ വെല്ലുവിളികളെയും അപകട സാധ്യതകളെയും കുറിച്ചുള്ള ബോധവത്കരണത്തിനായി പ്രീ-ഓറിയന്റേഷന് സെഷനുകള് നടത്താറുണ്ടെന്നും കൃത്യമായ ഇടവേളകളില് സുരക്ഷാ നിര്ദ്ദേശങ്ങള് പുറപ്പെടുവിക്കാറുണ്ടെന്നും കേന്ദ്ര വിദേശകാര്യ മന്ത്രാലയം അറിയിച്ചിരുന്നു. ഇന്ത്യന് വിദ്യാര്ഥികളുടെ സുരക്ഷയെ കുറിച്ച് ലോക്സഭയില് അസദുദ്ദീന് ഉവൈസി എം.പി. ഉന്നയിച്ച ചോദ്യത്തിനായിരുന്നു മറുപടി.
സാധാരണക്കാരനായ ഒരു വിദ്യാര്ത്ഥിയല്ല സാകേത്. പഠനകാര്യത്തില് അതീവ മിടുക്കനായിരുന്നു ഈ 22-കാരന്. ബംഗളൂരു സ്വദേശിയായ ഇദ്ദേഹം ഐഐടി മദ്രാസില് നിന്നാണ് ബിരുദം പൂര്ത്തിയാക്കിയത്. ഹൈപ്പര്ലൂപ്പിനായുള്ള 'മൈക്രോചാനല് കൂളിങ് സിസ്റ്റം' വികസിപ്പിച്ചെടുത്ത ആറംഗ പ്രതിഭാ സംഘത്തില് സാകേതും ഉള്പ്പെട്ടിരുന്നു. ഇത്രയും മികച്ച ഭാവി മുന്നിലുള്ള ഒരു യുവാവിനെ കാണാതായത് ഇന്ത്യന് വിദ്യാര്ത്ഥി സമൂഹത്തെ ഒന്നടങ്കം നടുക്കിയിട്ടുണ്ട്.
സാകേതിനെ കണ്ടെത്താനായി സോഷ്യല് മീഡിയ പ്ലാറ്റ്ഫോമുകളില് മലയാളികള് ഉള്പ്പെടെയുള്ള പ്രവാസി കൂട്ടായ്മകള് സജീവമാണ്. കാണാതായ വിദ്യാര്ത്ഥിയെക്കുറിച്ച് എന്തെങ്കിലും വിവരം ലഭിക്കുന്നവര് ഉടന് അറിയിക്കണമെന്ന് ആവശ്യപ്പെട്ട് ക്യാമ്പയിനുകള് നടക്കുന്നുണ്ട്. സാന്ഫ്രാന്സിസ്കോയിലെ ഇന്ത്യന് കോണ്സുലേറ്റ് വിഷയത്തില് ഇടപെട്ടിട്ടുണ്ട്. വിദ്യാര്ത്ഥിയുടെ കുടുംബവുമായി അധികൃതര് നിരന്തരം ബന്ധപ്പെട്ടുവരികയാണ്.