ലാഭം വാഗ്ദാനത്തിന്റെ പേരില്‍ തട്ടിപ്പ്; മട്ടാഞ്ചേരി സ്വദേശിയില്‍ നിന്ന് തട്ടിയത് 46 ലക്ഷം രൂപ; രണ്ട് സിനിമാ പ്രവര്‍ത്തകര്‍ അറസ്റ്റില്‍; പ്രതികളെ പിടികൂടിയത് മൊബെല്‍ ഫോണ്‍ ലൊക്കേഷന്‍ കേന്ദ്രീകരിച്ച് നടത്തിയ അന്വേഷണത്തില്‍
കൊച്ചി: ലാഭം വാഗ്ദാനത്തിന്റെ പേരില്‍ വലിയ ഓണ്‍ലൈന്‍ തട്ടിപ്പ് നടത്തിയ രണ്ട് സിനിമാ പ്രവര്‍ത്തകര്‍ അറസ്റ്റില്‍. മട്ടാഞ്ചേരി സ്വദേശിയില്‍ നിന്നു 46 ലക്ഷം രൂപ തട്ടിയെടുത്ത കേസിലാണ് അസോസിയേറ്റ് ഡയറക്ടര്‍ ശ്രീദേവ് (35)യും കോസ്റ്റ്യൂമര്‍ മുഹമ്മദ് റാഫി (37)യും മട്ടാഞ്ചേരി പൊലീസിന്റെ പിടിയിലായത്. ലാഭം നിറഞ്ഞ നിക്ഷേപ സാധ്യതകളായി പ്രലോഭിപ്പിച്ച് തട്ടിപ്പ് നടത്തുകയായിരുന്നു ഇരുവരും. സാമ്പത്തിക തട്ടിപ്പുകള്‍ സിനിമാ മേഖലയിലേക്ക് വരെ നീളുന്നത് അന്വേഷണ സംഘത്തിനും വലിയ ഞെട്ടലാണ്.
കഴിഞ്ഞ ജനുവരി, ഫെബ്രുവരി മാസങ്ങളിലായാണ് മട്ടാഞ്ചേരി സ്വദേശിയായ യുവാവ് ഓണ്‍ലൈന്‍ സാമ്പത്തിക തട്ടിപ്പിരയായത്. ആപ്പില്‍ പണം നിക്ഷേപിച്ച് അതിലുള്ള ബില്‍ഡിങിന് റേറ്റിങ് നല്‍കിയാല്‍ കൂടുതല്‍ ലാഭം നല്‍കാം എന്നും വിശ്വസിപ്പിച്ചായിരുന്നു തട്ടിപ്പ്. ഇതിനായി യുവാവിന്റെ ഫോണിലേക്ക് പ്രതികള്‍ വാട്ട്സ്ആപ്പിലുടെ ലിങ്ക് അയച്ച്കൊടുക്കുകയായിരുന്നു. ഇങ്ങനെ പലതവണകളായി 46 ലക്ഷം രൂപയാണ് പ്രതികള്‍ തട്ടിയെടുത്തത്.
പ്രതികളുടെ മൊബെല്‍ ഫോണ്‍ ലൊക്കേഷന്‍ കേന്ദ്രീകരിച്ച് നടത്തിയ അന്വേഷണത്തിലാണ് ശ്രീദേവും മുഹമ്മദ് റാഫിയും അറസ്റ്റിലായത്. എറണാകുളം പെരിങ്ങാല സ്വദേശിയും സിനിമകളില്‍ അസ്സോസ്സിയേറ്റ്ഡയറക്ടറുമാണ് ശ്രീദേവ്. കണ്ണൂര്‍ കണ്ണാടിപറമ്പ് സ്വദേശി മുഹമ്മദ്റാഫി സിനിമയില്‍ കോസ്റ്റ്യൂമറുമാണ്.