കിളിമാനൂരിൽ മിനി ലോറിയുടെ പിന്നിൽ ഇരുചക്ര വാഹനം ഇടിച്ച് കയറി; അപകടത്തിൽ 2 പേർക്ക് ദാരുണാന്ത്യം

തിരുവനന്തപുരം: കിളിമാനൂരിൽ റോഡരികിൽ നിർത്തിയിട്ടിരുന്ന മിനി ലോറിയുടെ പിന്നിൽ ഇരുചക്ര വാഹനം ഇടിച്ച് കയറി ഉണ്ടായ അപകടത്തിൽ രണ്ട് പേർ മരിച്ചു. പുലർച്ചെ രണ്ട് മണിയോടെ സംസ്ഥാന പാതയിൽ പുളിമാത്ത് ജംഗ്ഷനിലായിരുന്നു അപകടം. സംഭവത്തിൽ പുളിമാത്ത് പേഴുംകുന്ന് സ്വദേശികളായ രഞ്ജു (36), അനി(40) എന്നിവരാണ് മരിച്ചത്. പ്രദേശത്ത് കനത്ത മഴയുള്ള സമയത്താണ് അപകടം സംഭവിച്ചത്.

സംസ്ഥാന പാതയിൽ റോഡരികിൽ മിനി ലോറി നിർത്തിയിട്ടിരിക്കുകയായിരുന്നു. ഈ ലോറിയിലേക്കാണ് രണ്ട് പേർ സ‌ഞ്ചരിച്ചിരുന്ന ഇരുചക്ര വാഹനം ഇടിച്ചു കയറിയത്. അമിത വേഗതയിലാണ് ഇരു ചക്ര വാഹനം ലോറിയിലേക്ക് ഇടിച്ച് കയറിയതെന്നാണ് വിവരം.

ഇടിയുടെ ആഘാതത്തിൽ സ്കൂട്ടറിന്റെ മുൻവശം പൂർണമായി തകർന്നിട്ടുണ്ട്. അപകടത്തിൽ ഗുരുതരമായി പരിക്കേറ്റ രണ്ട് പേരെയും തിരുവനന്തപരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. രണ്ട് പേരുടെയും മൃതദേഹങ്ങൾ തുടർ നടപടികൾക്ക് ശേഷം വീട്ടുകാർക്ക് വിട്ടു നൽകി.