സ്‌കൂട്ടറിന് സൈഡ് കൊടുത്തില്ല; വൈരാഗ്യം മൂത്ത് തമ്മിലടി; മൂന്നാറിൽ വിനോദസഞ്ചാരികളെ മർദിച്ച യുവാക്കൾക്കെതിരെ വധശ്രമത്തിന് കേസെടുത്ത് പോലീസ്
ഇടുക്കി: മൂന്നാറിൽ വാഹനം സൈഡ് കൊടുക്കുന്നതുമായി ബന്ധപ്പെട്ട തർക്കത്തിനിടയിൽ വിനോദസഞ്ചാരികളെ മർദിച്ച സംഭവത്തിൽ മൂന്ന് പേർക്കെതിരെ വധശ്രമത്തിന് കേസെടുത്തു. തമിഴ്നാട്ടിൽ ഹോട്ടൽ മാനേജ്മെന്റ് കോഴ്സിന് പഠിക്കുന്ന വിദ്യാർത്ഥികളുടെ സംഘത്തെയാണ് പ്രതികൾ ക്രൂരമായി മർദ്ദിച്ചത്. ഈ ആക്രമണത്തിൽ രണ്ട് ടൂറിസ്റ്റുകൾക്ക് സാരമായ പരിക്കേൽക്കുകയും നിലവിൽ ചികിത്സ തേടുകയും ചെയ്തു.
കഴിഞ്ഞ ദിവസമാണ് സംഭവം നടന്നത്. പളളിവാസലിന് സമീപത്തുവെച്ചാണ് ടൂറിസ്റ്റുകൾ സഞ്ചരിച്ച വാഹനം ഒരു ഇരുചക്ര വാഹനത്തിന് വഴി നൽകിയില്ലെന്ന പേരിൽ അതിക്രമം നടന്നത്. ആറ്റുകാട് സ്വദേശികളായ കൗശിക്, സുരേന്ദ്രൻ, അരുൺ സൂര്യ എന്നിവർ ചേർന്നാണ് വിദ്യാർത്ഥികളെ മർദ്ദിച്ചത്. കല്ലുകൊണ്ട് ആക്രമിച്ചതിൽ തൃച്ചി സ്വദേശികളായ അരവിന്ദ്, ഗുണശീലൻ എന്നിവർക്കാണ് ഗുരുതരമായി പരിക്കേറ്റത്. ഇവരെ ഉടൻ തന്നെ ആശുപത്രിയിൽ പ്രവേശിപ്പിച്ചു.
സംഭവത്തെ തുടർന്ന് പോലീസ് കേസെടുക്കുകയും പ്രതികളായ മൂന്നുപേരെയും അറസ്റ്റ് ചെയ്യുകയുമുണ്ടായി. ഇവരെ കോടതിയിൽ ഹാജരാക്കിയതിനെത്തുടർന്ന് റിമാൻഡ് ചെയ്തു.