രാത്രി മുത്തങ്ങ വഴി എത്തിയ ആ റെഡ് ഹ്യുണ്ടായി കാർ; വരവിൽ തന്നെ പന്തികേട്; പരിശോധനയിൽ കോടികളുടെ തിളക്കം; കൈയ്യോടെ പൊക്കി എക്സൈസ്

കൽപ്പറ്റ: വയനാട് മുത്തങ്ങയിൽ വൻ കുഴൽപ്പണവേട്ട. കാറിൽ കടത്താൻ ശ്രമിച്ച ഒരു കോടി പതിനൊന്ന് ലക്ഷം രൂപ എക്‌സൈസ് പിടിച്ചെടുത്തു. നൂൽപ്പുഴ നായ്ക്കട്ടി സ്വദേശി സി.കെ. മുനീറാണ് പണവുമായി പിടിയിലായത്.

വയനാട് ഡെപ്യൂട്ടി എക്സൈസ് കമ്മീഷണറുടെ നിർദ്ദേശാനുസരണം അതിർത്തിയിൽ നടത്തിയ പരിശോധനയിലാണ് പണം കണ്ടെടുത്തത്. കർണാടക ഭാഗത്തുനിന്ന് കേരളത്തിലേക്ക് വരികയായിരുന്ന ചുവന്ന ഹ്യൂണ്ടായി കാറിൽ വിവിധ ഭാഗങ്ങളിലായി ഒളിപ്പിച്ച നിലയിലായിരുന്നു പണം.

പണത്തിൻ്റെ രേഖകൾ ഹാജരാക്കാൻ മുനീറിന് കഴിഞ്ഞില്ല. തുടർന്ന് ഇത് കുഴൽപ്പണമാണെന്ന് സ്ഥിരീകരിച്ച് എക്സൈസ് സംഘം ഇയാളെ കസ്റ്റഡിയിലെടുത്തു. തിരഞ്ഞെടുപ്പ് നടക്കുന്ന സാഹചര്യത്തിൽ അതിർത്തികളിൽ പരിശോധന കർശനമാക്കിയിരുന്നു. മുനീറിനെയും പിടികൂടിയ പണവും തുടർനടപടികൾക്കായി എക്‌സൈസ് ഉദ്യോഗസ്ഥർ ആദായനികുതി വകുപ്പിന് കൈമാറി.