ബംഗ്ലാദേശ് : സന്യാസിമാരുടെ അറസ്റ്റ് മനുഷ്യാവകാശ ലംഘനമെന്ന് ഭാരതീയ വിചാര കേന്ദ്രം; സന്യാസികളുടെ മോചനം ഉറപ്പു വരുത്തണമെന്ന് അന്താരാഷ്ട്ര സംഘടനകളോട് ആവശ്യപ്പെട്ട് ആര്‍ സഞ്ജയന്‍
തിരുവനന്തപുരം: ബംഗ്ലാദേശ് സര്‍ക്കാര്‍, കള്ളക്കേസ് ചുമത്തി അന്താരാഷ്ട്ര കൃഷ്ണാവബോധ പ്രസ്ഥാനത്തിലെ രണ്ട് സന്ന്യാസിമാരെ അറസ്റ്റ് ചെയ്തു ജയിലില്‍ അടച്ച സംഭവം നഗ്‌നമായ മനുഷ്യാവകാശ ലംഘനമാണെന്ന് ഭാരതീയ വിചാര കേന്ദ്രം. ഹിന്ദുക്കള്‍ ഉള്‍പ്പെടെയുള്ള ന്യൂനപക്ഷ ജനവിഭാഗങ്ങളുടെ ജീവനും സ്വത്തിനും സംരക്ഷണം നല്‍കണമെന്ന് ആവശ്യപ്പെട്ടുകൊണ്ടുള്ള പ്രതിഷേധ പരിപാടികള്‍ക്ക് നേതൃത്വം നല്‍കിയത് കൊണ്ടാണ് സര്‍ക്കാര്‍ സന്ന്യാസിമാര്‍ക്കെതിരെ പ്രതികാര നടപടികള്‍ കൈക്കൊണ്ടിട്ടുള്ളതെന്ന് ഡയറക്ടര്‍ ആര്‍ സഞ്ജയന്‍ കുറ്റപ്പെടുത്തി.
ന്യൂനപക്ഷ ജനവിഭാഗങ്ങള്‍ക്കെതിരെ ഇസ്ലാമിക മതമൗലികവാദ പ്രസ്ഥാനങ്ങള്‍ നടത്തുന്ന കിരാതമായ ആക്രമണ പരമ്പരകളെ തടയുന്നതില്‍ ബംഗ്ലാദേശ് സര്‍ക്കാര്‍ പൂര്‍ണ്ണമായി പരാജയപ്പെട്ടിരിക്കുകയാണ് . നിലവിലുള്ള ഭരണഘടനയെ അട്ടിമറിച്ച് ഒരു മതാധിഷ്ഠിത ഭരണം ജനങ്ങളുടെ മേല്‍ അടിച്ചേല്‍പ്പിക്കാനുള്ള ശ്രമത്തിന്റെ മുന്നോടിയാണ് ഇപ്പോഴത്തെ ന്യൂനപക്ഷ വേട്ട എന്ന ആരോപണത്തിന് മറുപടി പറയാന്‍ മുഹമ്മദ് യൂനിസ് സര്‍ക്കാരിന് ബാധ്യതയുണ്ട്.
മുസ്ലീങ്ങള്‍ക്ക് മഹാഭൂരിപക്ഷമുള്ള ബംഗ്ലാദേശില്‍ നിന്ന് അവശേഷിക്കുന്ന മറ്റ് മത വിഭാഗങ്ങളെ ഭയപ്പെടുത്തി പലായനം ചെയ്യുവാന്‍ സാഹചര്യം സൃഷ്ടിക്കുകയാണ് ഇസ്ലാമിക തീവ്ര വാദികളുടെ ഗുഢലക്ഷ്യം. ഇതിനെതിരെ ഉറച്ച നിലപാടു കൈക്കൊള്ളണമെന്നും സന്യാസിമാരുടെ മോചനം ഉറപ്പുവരുത്തണമെന്നും ഭാരത സര്‍ക്കാരിനോടും, ഐക്യരാഷ്ട്ര സംഘടന ഉള്‍പ്പെടെയുള്ള അന്തര്‍ദേശീയ മനുഷ്യാവകാശ സംരക്ഷണ പ്രസ്ഥാനങ്ങളോടും ഭാരതീയ വിചാര കേന്ദ്രം ആവശ്യപ്പെട്ടു.