കോളേജ് പഠനകാലത്തെ പക മറന്നില്ല; രണ്ടു വര്‍ഷത്തിന് ശേഷം യുവാവിനെ ബ്‌ളേഡുകൊണ്ട് മുറിവേല്‍പ്പിച്ചതായി പരാതി
യുവാവിനെ ബ്‌ളേഡുകൊണ്ട് മുറിവേല്‍പ്പിച്ചതായി പരാതി
കണ്ണൂര്‍: കോളേജ് പഠനകാലത്തെ തര്‍ക്കത്തെ തുടര്‍ന്നുള്ള വൈരാഗ്യത്താല്‍ രണ്ടു വര്‍ഷത്തിനുശേഷം യുവാവിനെതിരെ ബ്‌ളേഡുകൊണ്ടുള്ള ആക്രമണമെന്ന് പരാതി. കണ്ണൂര്‍ നഗരത്തിലെ തെക്കി ബസാറില്‍ ഞായറാഴ്ച രാത്രി 10 മണിയോടെ അധ്യാപക പരിശീലന വിദ്യാര്‍ത്ഥി മുഹമ്മദ് മുനീസിന് നേരെ ആക്രമണമുണ്ടായി.
മൂര്‍ച്ചയേറിയ ബ്ലേഡ് കൊണ്ടുള്ള ആക്രമണത്തില്‍ മുനീസിന് മുഖത്തും ചുണ്ടിനും പരുക്കേറ്റു. കോളേജ് പഠനകാലത്തെ കൂടെയുണ്ടായിരുന്ന ജൂനിയര്‍ വിദ്യാര്‍ത്ഥികളാണ് ആക്രമിച്ചതെന്നാണ് മുനീസ് പരാതിയില്‍ പറയുന്നത്. അക്രമി സംഘത്തിനെതിരെ കണ്ണൂര്‍ ടൗണ്‍ പോലീസില്‍ പരാതി നല്‍കിയിട്ടുണ്ട്.
സംഭവത്തില്‍ കേസെടുത്ത് അന്വേഷണമാരംഭിച്ചതായി കണ്ണൂര്‍ ടൗണ്‍ പൊലിസ് അറിയിച്ചു. സംഭവത്തിന്റെ സി.സി.ടി.വി ദൃശ്യങ്ങള്‍ പൊലിസ് പരിശോധിച്ചു വരികയാണ്. ബ്‌ളേഡ് കൊണ്ടുള്ള ആക്രമത്തില്‍ മുനീസ് സംസാരിക്കാന്‍ പോലും കഴിയാതെ കണ്ണൂരിലെ സ്വകാര്യ ആശുപത്രിയില്‍ ചികിത്സയിലാണ്. ബന്ധുക്കള്‍ നല്‍കിയ പരാതിയിലാണ് പൊലിസ് കണ്ടാലറിയാവുന്ന സംഘത്തിനെതിരെ വധശ്രമത്തിന് കേസെടുത്തത്.