ഇന്‍സ്റ്റഗ്രാമിലൂടെ പരിചയപ്പെട്ട പതിനേഴുകാരിയെ പ്രലോഭിപ്പിച്ച് കൂട്ടിക്കൊണ്ടുപോയി പീഡിപ്പിച്ചു; അറസ്റ്റിലായ പ്രതിക്കെതിരെ പോക്‌സോ; ടാറ്റു ആര്‍ട്ടിസ്റ്റായ യുവാവിന് എതിരെ മയക്കുമരുന്ന് കേസും
ഇന്‍സ്റ്റഗ്രാമിലൂടെ പരിചയപ്പെട്ട പതിനേഴുകാരിയെ പ്രലോഭിപ്പിച്ച് കൂട്ടിക്കൊണ്ടുപോയി പീഡിപ്പിച്ചു
കോഴിക്കോട് : വെള്ളിമാട്കുന്ന് നിര്‍ഭയ എന്‍ട്രി ഹോമിലെ പ്രായപൂര്‍ത്തിയാവാത്ത വിദ്യാര്‍ഥിനിയെ ലൈംഗികമായി പീഡിപ്പിച്ച യുവാവ് അറസ്റ്റില്‍. കോഴിക്കോട് കാക്കൂര്‍ സ്വദേശി സഞ്ജയ് നിവാസില്‍ സഞ്ജയ്യെയാണ് ടൗണ്‍ പൊലീസ് അറസ്റ്റ് ചെയ്തത്.. ഇയാള്‍ക്കെതിരെ പോക്‌സോ നിയമപ്രകാരമുള്ള വകുപ്പുകള്‍ ചുമത്തി.
നിര്‍ഭയ എന്‍ട്രി ഹോമില്‍ താമസിക്കുന്ന 17 വയസ് മാത്രം പ്രായമുള്ള വിദ്യാര്‍ഥിനിയെ ഇന്‍സ്റ്റാഗ്രാമിലൂടെ പരിചയപ്പെട്ട പ്രതി പ്രലോഭിപ്പിച്ച് കൂട്ടികൊണ്ടുപോയി കോഴിക്കോട് അപ്‌സര തിയേറ്ററിന് സമീപത്തുള്ള ലോഡ്ജിലെത്തിച്ച് ലൈംഗികമായി പീഡിപ്പിക്കുകയായിരുന്നു.
കഴിഞ്ഞ ചൊവ്വാഴ്ചയാണ് നിര്‍ഭയ എന്‍ട്രി ഹോമി ല്‍ നിന്ന് സ്‌കൂളിലേക്ക് പോകുന്നതിനിടെ പെണ്‍കുട്ടിയെ കാണാതായത്. അന്ന് രാത്രി തന്നെ ചേവായൂര്‍ പൊലീസ് ബീച്ചില്‍ വെച്ച് പെണ്‍കുട്ടിയെ കണ്ടെത്തി. തുടര്‍ന്ന് ചേവായൂര്‍ പൊലീസ് പെണ്‍കുട്ടിയെ ഡിഡബ്ല്യുസിക്ക് മുമ്പാകെ ഹാജരാക്കി മൊഴിയെടുത്തതില്‍ പെണ്‍കുട്ടി ലൈംഗികമായി പീഡിപ്പിക്കപ്പെട്ട വിവരം പറയുകയുമായിരുന്നു. തുടര്‍ന്ന് ചേവായൂര്‍ പൊലീസ് കേസ് രജിസ്റ്റര്‍ ചെയ്യുകയും പെണ്‍കുട്ടി പീഡനത്തിന് ഇരയായത് ടൗണ്‍ പോലീസ് സ്റ്റേഷന്‍ പരിധിയില്‍ ആയതിനാല്‍ കേസ് ടൗണ്‍ പൊലീസിന് കൈമാറുകയായിരുന്നു.
ടൗണ്‍ പൊലീസ് സൈബര്‍ സെല്ലുമായി ചേര്‍ന്ന് നടത്തിയ ശാസ്ത്രീയ അന്വേഷണത്തില്‍ പ്രതിയെപ്പറ്റി മനസ്സിലാക്കുകയും കോഴിക്കോട് വെച്ച് ടൗണ്‍ പോലീസ് സ്റ്റേഷന്‍ ഇന്‍സ്‌പെക്ടര്‍ സജീഷിന്റെ നേതൃത്വത്തില്‍ എസ്സിപിഒമാരായ അജേഷ്, വിജീഷ്, സിപിഒ മാരായ അബ്ദുള്‍ ജലീല്‍, പ്രസാദ് എന്നിവരടങ്ങുന്ന അന്വേഷണസംഘം പ്രതിയെ കസ്റ്റഡിയിലെടുത്തു. എസ്എം സ്ട്രീറ്റില്‍ ടാറ്റൂ ആര്‍ട്ടിസ്റ്റായി ജോലി ചെയ്യുന്ന പ്രതി മയക്കുമരുന്ന് ഉപയോഗിക്കുന്നതിനിടെ പിടിയിലായതിന് നടക്കാവ് പൊലീസ് സ്റ്റേഷനില്‍ ഒരു കേസ് നിലവിലുണ്ട്. അറസ്റ്റ് രേഖപ്പെടുത്തിയ ശേഷം പ്രതിയെ കോടതിയില്‍ ഹാജരാക്കി.