ബസ് സ്റ്റോപ്പിലേക്ക് ഡെലിവറി വാൻ ഇടിച്ചു കയറി; രണ്ടു പേർക്ക് ദാരുണാന്ത്യം; ഒരാളുടെ കാൽ ഒടിഞ്ഞുമാറി; ജീവനക്കാർ ഓടി രക്ഷപ്പെട്ടു

കൊട്ടാരക്കര: ബസ് കാത്തുനിന്നവരുടെ നേർക്ക് ഡെലിവറി വാൻ ഇടിച്ചു കയറി രണ്ടു പേർക്ക് ദാരുണാന്ത്യം. ഓട്ടോറിക്ഷ ഡ്രൈവർക്ക് ഗുരുതര പരുക്കേറ്റു. പനവേലി ജംക്‌ഷനിൽ ഇന്ന് രാവിലെയാണ് അപകടമുണ്ടായത്. കൊട്ടിയത്ത് നഴ്സായ വെട്ടിക്കവല നിരപ്പിൽ ഷാൻ ഭവനിൽ സോണിയ (43), കൊട്ടാരക്കരയിലെ ബേക്കറി ജീവനക്കാരിയായ പനവേലി ചരുവിളവീട്ടിൽ ശ്രീക്കുട്ടി (27) എന്നിവരാണ് മരിച്ചത്. ഡ്രൈവർ ഉറങ്ങിയതാണ് അപകടത്തിനു കാരണമെന്നാണ് പ്രാഥമിക നിഗമനം.

ഓട്ടോറിക്ഷ ഡ്രൈവർ വിജയന്റെ (57) കാൽ ഒടിഞ്ഞുമാറി. ആറു വർഷം മുൻപും വിജയന് അപകടത്തിൽ കാലിനു പരുക്കേറ്റിരുന്നു. വാളകം ഭാഗത്തുനിന്ന് കൊട്ടാരക്കരയിലേക്കു വരികയായിരുന്നു വാൻ ബസ് കാത്തുനിന്നവരുടെ നേർക്ക് ഇടിച്ചു കയറുകയായിരുന്നു. വാൻ പോലീസ് കസ്റ്റഡിയിൽ. വാഹനത്തിലുണ്ടായിരുന്ന ജീവനക്കാർ ഓടി രക്ഷപ്പെട്ടു.