പ്രായപൂർത്തിയാകാത്ത സ്‌കൂൾ വിദ്യാർത്ഥികൾക്ക് കഞ്ചാവ് നൽകി; മാതാപിതാക്കളുടെ പരാതിയിൽ രണ്ട് പേർ പിടിയിൽ
ആലപ്പുഴ: പൂച്ചാക്കൽകുളങ്ങരയിൽ പ്രായപൂർത്തിയാകാത്ത സ്‌കൂൾ വിദ്യാർത്ഥികൾക്ക് കഞ്ചാവ് നൽകി കേസിൽ രണ്ട് പേർ അറസ്റ്റിൽ. ആലപ്പുഴ പൂച്ചാക്കൽകുളങ്ങര വെളിവീട്ടിൽ ആദിത്യൻ ( 18), പാണാവളളി അടിച്ചീനികർത്തിൽ വീട്ടിൽ അഭിജിത്ത് ( 25) എന്നിവരാണ് പോലീസിന്റെ പിടിയിലായത്. കുട്ടികളുടെ മാതാപിതാക്കൾക്ക് നൽകിയ പരാതിയിലായിരുന്നു അറസ്റ്റ്. പ്രതികൾ കുട്ടികൾക്ക് കഞ്ചാവ് നൽകി വലിപ്പിച്ചു എന്നാണ് പരാതി. പൂച്ചാക്കൽ പോലീസാണ് പ്രതികളെ പിടികൂടിയത്.
കഴിഞ്ഞ ദിവസങ്ങളിലാണ് കേസിനാസ്‌പദമായ സംഭവം. പൂച്ചാക്കൽകുളങ്ങര ശക്തിമൂർത്തി അമ്പലത്തിനടുത്തുള്ള കടവിൽ വെച്ചാണ് പ്രദേശവാസികളായ വിദ്യാർത്ഥികൾക്ക് പ്രതികൾ കഞ്ചാവ് നൽകിയത്. ഇവിടെ വച്ച് തന്നെ വിദ്യാർത്ഥികളെ കൊണ്ട് ഇത് വലിപ്പിക്കുകയും ചെയ്തു. വിദ്യാർത്ഥികൾ വീട്ടിലെത്തിയപ്പോൾ മാതാപിതാക്കൾക്ക് സംശയം തോന്നി. തുടർന്ന് വിവരം അന്വേഷിക്കുകയും പോലീസിനെ അറിയിക്കുകയുമായിരുന്നു. സംഭവത്തിൽ പൂച്ചാക്കൽ പോലീസ് അന്വേഷണം നടത്തി.
പൂച്ചാക്കൽ പോലീസ് ഇൻസ്പെക്ടർ സുബ്രഹ്മണ്യന്റെ നേതൃത്വത്തിലായിരുന്നു അന്വേഷണം. പോലീസ് വിദ്യാർത്ഥികളുടെ മൊഴി രേഖപ്പെടുത്തിയിരുന്നു. തുടർന്ന് കഞ്ചാവ് നൽകിയ ആദിത്യനെയും അഭിജിത്തിനെയും പിടികൂടി. ഇവരെ അറസ്റ്റ് രേഖപ്പെടുത്തിയ ശേഷം വൈദ്യപരിശോധനയടക്കം പൂർത്തിയാക്കി. തുടർന്ന് കോടതിയിൽ ഹാജരാക്കി. ഇരുവരെയും കോടതി ജുഡീഷ്യൽ കസ്റ്റഡിയിൽ വിട്ടു.
കേസിൽ പോലീസ് വിശദമായ അന്വേഷണം നടത്തി വരികയാണ്. പ്രതികൾക്ക് കഞ്ചാവ് ലഭിച്ചത് എവിടെ നിന്നെന്ന് അറിയാൻ അന്വേഷണം നടത്തുമെന്ന് പോലീസ് അറിയിച്ചു. അന്യ സംസ്ഥാനങ്ങളിൽ നിന്നും കഞ്ചാവ് കടത്തിയതാണോ എന്നതുൾപ്പെടെയുള്ള കാര്യങ്ങൾ വ്യക്തത വരാനുണ്ട്.