സ്വന്തം ഭാര്യയെ നടുറോഡിൽ തടഞ്ഞു നിർത്തി ഭർത്താവ് കുത്തി പരിക്കേൽപ്പിച്ചു; കൈമുട്ടിന് താഴെ ആഴത്തിൽ മുറിവ്; ദാരുണ സംഭവം കൊല്ലത്ത്

കൊല്ലം: കൊല്ലം കരുനാഗപ്പള്ളിയിൽ ഭാര്യയെ ഭർത്താവ് അതിക്രൂരമായി റോഡിലിട്ട് വെട്ടിപ്പരിക്കേൽപ്പിച്ചു. ഇന്നലെ വൈകിട്ട് അഞ്ച് മണിയോടെ കണ്ണമ്പള്ളി ക്ഷേത്രത്തിന് സമീപം വെച്ചായിരുന്നു സംഭവം. കുടുംബ പ്രശ്നങ്ങളെ തുടർന്ന് ഭാര്യ ചവറ പോലീസിൽ നൽകിയ പരാതിയിലെ വൈരാഗ്യമാണ് ആക്രമണത്തിന് കാരണമെന്ന് പോലീസ് അറിയിച്ചു.

കണ്ണമ്പള്ളി സ്വദേശിനിയായ ചിഞ്ചുവിനാണ് ആക്രമണത്തിൽ ഗുരുതരമായി പരിക്കേറ്റത്. ഭർത്താവ് പ്രശോഭാണ് യുവതിയെ റോഡിൽ തടഞ്ഞു നിർത്തി ആക്രമിച്ചത്. യുവതിയെ രക്ഷിക്കാൻ ശ്രമിക്കുന്നതിനിടെയാണ് കൈമുട്ടിന് താഴെ ആഴത്തിൽ മുറിവേറ്റത്.

പ്രതിയായ പ്രശോഭിനെ കരുനാഗപ്പള്ളി പോലീസ് ഇതിനോടകം പിടികൂടിയിട്ടുണ്ട്. പരിക്കേറ്റ യുവതിയെ ഉടൻ തന്നെ അടുത്തുള്ള ആശുപത്രിയിൽ പ്രവേശിപ്പിച്ചു. കൂടുതൽ വിവരങ്ങൾ പോലീസ് അന്വേഷിച്ചു വരികയാണ്. കുടുംബവഴക്കുകളെ തുടർന്ന് ഭാര്യ നൽകിയ പരാതിയാണ് ഭർത്താവിനെ പ്രകോപിപ്പിച്ചത് എന്ന് പ്രാഥമിക അന്വേഷണത്തിൽ കണ്ടെത്തിയിട്ടുണ്ട്.