മദ്യപാനവും ദേഹോപദ്രവവും മൂലം അകന്നുകഴിഞ്ഞ യുവതിയെ ബിയര്‍കുപ്പികൊണ്ട് ആക്രമിച്ച ഭര്‍ത്താവ് അറസ്റ്റില്‍

തിരുവല്ല: ഭര്‍ത്താവ് മദ്യപിച്ചുവന്ന് നിരന്തരം ദേഹോപദ്രവം തുടര്‍ന്നപ്പോള്‍ പിണങ്ങി മാറി അമ്മയ്ക്കൊപ്പം വാടകവീട്ടില്‍ താമസിക്കുന്ന യുവതിയെ വീടുകയറി ആക്രമിച്ചു. ബിയര്‍ കുപ്പി കൊണ്ടുള്ള ഭര്‍ത്താവിന്റെ ആക്രമണത്തില്‍ മുപ്പതുകാരിക്ക് ഗുരുതര പരുക്ക്. ഭര്‍ത്താവിനെതിരെ വധശ്രമത്തിനു കേസെടുത്ത് തിരുവല്ല പോലീസ്. തിരുവല്ല കുറ്റപ്പുഴ മഞ്ഞാടി തൈമല മൈലമ്മൂട്ടില്‍ വീട്ടില്‍ എം കെ രാജേഷി (39)നെ പോലീസ് അറസ്റ്റ് ചെയ്തു.പോലീസ് ഇന്‍സ്പെക്ടര്‍ എസ് സന്തോഷിന്റെ നേതൃത്വത്തിലാണ് അന്വേഷണം നടക്കുന്നത്.

7 വര്‍ഷം മുമ്പ് വിവാഹിതരായവരാണ് ഇരുവരും. സംശയരോഗമുള്ള ഭര്‍ത്താവ് മദ്യപിച്ചു വന്ന് നിരന്തരം മര്‍ദ്ദിക്കുമെന്ന് യുവതി പോലീസിന് മൊഴി നല്‍കി. വിവാഹം കഴിഞ്ഞതുമുതല്‍ തുടങ്ങിയതാണ് മദ്യപിച്ചെത്തിയുള്ള ദേഹോപദ്രവം.യുവതി ഇപ്പോള്‍ അമ്മയ്ക്കും സഹോദരിക്കുമൊപ്പം താമസിക്കുന്ന വീട്ടില്‍ 10 ന് രാവിലെ 9.30 ന് അതിക്രമിച്ചു കയറി ഉപദ്രവിക്കുകയായിരുന്നു. ഇയാള്‍ക്കൊപ്പം വീട്ടിലേക്ക് പോകാന്‍ വിളിച്ചപ്പോള്‍ പോകുന്നില്ല എന്ന് പറഞ്ഞതിനാണ് തുണി അലക്കിക്കൊണ്ടിരുന്ന യുവതിയെ വഴക്കുണ്ടാക്കി പിടിച്ചു തള്ളി താഴെ ഇട്ടതും, തുടര്‍ന്ന് നെഞ്ചത്ത് അമര്‍ത്തിപ്പിടിച്ച ശേഷം ബിയര്‍ കുപ്പി കൊണ്ട് ആക്രമിച്ചതും. കൊല്ലണമെന്ന് ഉദ്ദേശിച്ച് അലക്കു കല്ലിന്റെ സൈഡില്‍ ഇരുന്ന ബിയര്‍ കുപ്പി എടുത്ത് ആദ്യം ഇവരുടെ നെറ്റിയില്‍ ആഞ്ഞടിച്ചു. പിന്നീട്, പൊട്ടിയ കഷ്ണം കൊണ്ട് കഴുത്തിലും താടിയിലും നെഞ്ചിലും കുത്തി മുറിവേല്‍പ്പിച്ചു കൊല്ലാന്‍ ശ്രമിക്കുകയായിരുന്നു.കഴുത്തില്‍ ആഴത്തില്‍ മുറിവേറ്റു.

രക്ഷപ്പെട്ട് ഓടിയ യുവതിയെ സഹോദരി ഓട്ടോറിക്ഷയില്‍ അടൂര്‍ താലൂക്ക് ആശുപത്രിയിലെത്തിച്ചു. പ്രതി, ഭാര്യയും അഞ്ചു വയസ്സുള്ള മകനെയും മദ്യപിച്ചെത്തി മര്‍ദ്ദിക്കുകയും വീട്ടില്‍ നിന്നിറക്കി വിടുകയും ചെയ്യുന്നത് പതിവാണ്. കഴിഞ്ഞ ഞായറാഴ്ചയും ദേഹോപദ്രവം ഏല്‍പ്പിച്ചതായി യുവതി പോലീസിനോട് പറഞ്ഞു. തുടര്‍ന്ന് വീട്ടില്‍ നിന്ന് ഇറക്കിവിട്ടു. യുവതിയും മകനും അമ്മയും സഹോദരിയും താമസിക്കുന്ന വീട്ടിലേക്ക് പോയി. അവിടെ എത്തിയാണ് ഇയാള്‍ കൂടെ പോകാന്‍ വിളിച്ചതും വിസമ്മതിച്ചപ്പോള്‍ ആക്രമിച്ചതും.

എ എസ് ഐ മിത്ര വി മുരളി ആശുപത്രിയിലെത്തി മൊഴി രേഖപ്പെടുത്തി. യുവതിയുടെ നെറ്റിയുടെ ഇടത് ഭാഗത്തും കീഴ്ച്ചുണ്ടിലും താടിയിലും കഴുത്തിന്റെ ഇടതുവശത്തും ബിയര്‍ കുപ്പിയുടെ കഷ്ണങ്ങള്‍ കൊണ്ടുള്ള പരിക്കുകള്‍ ഏറ്റു. നെഞ്ചില്‍ വരഞ്ഞ മുറിവുകളുമുണ്ടായി. പോലീസിന്റെ അന്വേഷണത്തില്‍ ഉച്ചയ്ക്ക് ഒന്നരയോടെ തിരുവല്ല കച്ചേരിപ്പടിയില്‍ നിന്നും പ്രതിയെ കസ്റ്റഡിയിലെടുത്തു. തുടര്‍ന്ന് പ്രതിയെ തിരിച്ചറിഞ്ഞ ശേഷം 2.45 ന് അറസ്റ്റ് രേഖപ്പെടുത്തി. വിശദമായി ചോദ്യം ചെയ്തപ്പോള്‍ കുറ്റം സമ്മതിച്ചു. ശാസ്ത്രീയ അന്വേഷണസംഘം സ്ഥലത്തെത്തി പരിശോധന നടത്തി, തെളിവുകള്‍ ശേഖരിച്ചു. കുപ്പിയുടെ കഷ്ണങ്ങളും മറ്റും കണ്ടെടുത്തു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.