സമൂഹം എപ്പോഴും അതിജീവിതയ്ക്കൊപ്പം, അനുകൂല വിധി ഉണ്ടാകുമെന്ന് പ്രതീക്ഷിക്കുന്നു; നടിയെ ആക്രമിച്ച കേസില് വിധി വരും മുമ്പ് കെ മുരളീധരന്റെ പ്രതികരണം ഇങ്ങനെ
സമൂഹം എപ്പോഴും അതിജീവിതയ്ക്കൊപ്പം, അനുകൂല വിധി ഉണ്ടാകുമെന്ന് പ്രതീക്ഷിക്കുന്നു
തിരുവനന്തപുരം: കൊച്ചിയില് നടി ആക്രമിക്കപ്പെട്ട കേസില് വിധി വരാനിരിക്കെ പ്രതികരണവുമായി മുതിര്ന്ന കോണ്ഗ്രസ് നേതാവ് കെ മുരളീധരന്. അതിജീവിതയ്ക്കൊപ്പമാണ് സമൂഹം എപ്പോഴുമുളളതെന്ന് കെ മുരളീധരന് പറഞ്ഞു. അനുകൂലമായ വിധി ഉണ്ടാകുമെന്ന് പ്രതീക്ഷിക്കുന്നുവെന്നും മുരളീധരന് പറഞ്ഞു. കേസില് എറണാകുളം സെഷന്സ് കോടതി വിധി പറയാന് ഇനി ഒരു മണിക്കൂര് മാത്രമാണ് ബാക്കിയുളളത്. സംഭവം നടന്ന് എട്ട് വര്ഷത്തിന് ശേഷമാണ് വിചാരണ കോടതി കേസില് വിധി പറയുന്നത്.
നടി ആക്രമിക്കപ്പെട്ട കേസിലെ വിധിയില് ആശങ്കയുണ്ടെന്ന് ഉമാ തോമസ് എംഎല്എ പറഞ്ഞിരുന്നു. കേസിലെ പ്രമുഖര് തടിതപ്പുമോ എന്നതില് ആശങ്കയുണ്ടെന്നും 50-50 ചാന്സാണ് കാണുന്നതെന്നും അവര് പറഞ്ഞു. 'പി ടിക്ക് കടുത്ത സമ്മര്ദ്ദമുണ്ടായിരുന്നു. മൊഴി കൊടുക്കരുത് എന്ന് പറഞ്ഞവരുണ്ട്. പി ടിക്ക് കൃത്യമായ നിലപാടുണ്ടായിരുന്നു. പി ടിയെ സംസാരിപ്പിക്കാതിരിക്കാന് പലരും ശ്രമിച്ചു. പല പ്രതിസന്ധികളും പിടിയ്ക്ക് നേരിടേണ്ടി വന്നു. അപായപ്പെടുത്താന് ശ്രമമുണ്ടായി. പല തരത്തിലുള്ള സുരക്ഷാ ഭീഷണിയും നേരിടേണ്ടി വന്നു. കേസുമായി ബന്ധപ്പെട്ട് ഒന്നും കൂട്ടിപ്പറയാനും കുറച്ചു പറയാനും തയ്യാറല്ലെന്ന് അന്നേ പി ടി പറഞ്ഞു': ഉമാ തോമസ് പറഞ്ഞു.
നടന് ദിലീപ് ഉള്പ്പെടെ പത്ത് പ്രതികളാണ് കേസില് ഉള്പ്പെട്ടിരിക്കുന്നത്. വിധി പ്രസ്താവിക്കുന്ന ഇന്ന് എല്ലാ പ്രതികളോടും കോടതിയില് ഹാജരാകണമെന്നും നിര്ദ്ദേശിച്ചിട്ടുണ്ട്. സുനില് എന് എസ്/ പള്സര് സുനി, മാര്ട്ടിന് ആന്റണി, ബി. മണികണ്ഠന്, വി പി വിജീഷ്, സലിം എച്ച്/ വടിവാള് സലിം, പ്രദീപ്, ചാര്ലി തോമസ്, പി ഗോപാലകൃഷ്ണന്/ ദിലീപ്, സനില് കുമാര്/ മേസ്തിരി സനില്, ശരത് ജി നായര് എന്നിവരാണ് കേസിലെ ഒന്ന് മുതല് 10വരെയുള്ള പ്രതികള്.