കേരളത്തില് ഇന്ന് തുലാവര്ഷം പൂര്ണ്ണമായും എത്തിച്ചേരും; തുടര്ന്ന് 20 വരെ വ്യാപക മഴയ്ക്ക് സാധ്യത; മൂന്ന് ജില്ലകളള്ക്ക് ഓറഞ്ച് അലര്ട്ട്: ഏഴ് ഇടങ്ങളില് യെല്ലോ അലര്ട്ട്
തിരുവനന്തപുരം: സംസ്ഥാനത്ത് അടുത്ത ദിവസങ്ങളില് മഴ തീവ്രതയാര്ജ്ജിക്കുമെന്ന് കാലാവസ്ഥാ വകുപ്പിന്റെ മുന്നറിയിപ്പ്. വ്യാഴാഴ്ചയോടെ തുലാവര്ഷം പൂര്ണ്ണമായും സംസ്ഥാനത്ത് എത്തിച്ചേരാനാണ് സാധ്യത. തുടര്ന്ന് 20 വരെ വ്യാപകമഴ ലഭിക്കാമെന്നാണ് പ്രവചനം.
കനത്തമഴയ്ക്ക് സാധ്യതയുള്ളതിനാല് തിരുവനന്തപുരം, കൊല്ലം, പത്തനംതിട്ട ജില്ലകളില് ഓറഞ്ച് മുന്നറിയിപ്പ് പുറപ്പെടുവിച്ചു. വെള്ളിയാഴ്ച എറണാകുളം ജില്ലയിലും സമാനമായ മുന്നറിയിപ്പുണ്ടാകും. ആലപ്പുഴ, കോട്ടയം, ഇടുക്കി ജില്ലകളിൽ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ ഇടത്തരം മഴയ്ക്കും മണിക്കൂറിൽ 40 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
വ്യാഴാഴ്ച തിരുവനന്തപുരം, കൊല്ലം, പത്തനംതിട്ട, ആലപ്പുഴ, തൃശ്ശൂര്, മലപ്പുറം ജില്ലകളില് കനത്ത മഴയ്ക്കുള്ള മഞ്ഞ മുന്നറിയിപ്പ് പ്രഖ്യാപിച്ചിട്ടുണ്ട്. വെള്ളിയാഴ്ച മലപ്പുറം ഒഴികെയുള്ള ജില്ലകള്ക്കും ഇടുക്കിയിലും ശക്തമായ മഴ ലഭിക്കാമെന്നാണ് മുന്നറിയിപ്പ്.
ഇതിനൊപ്പം, അറബിക്കടലില് 19-ഓടെ ന്യൂനമര്ദം രൂപപ്പെടാനാണ് സാധ്യത. ഇത് കേരളത്തിന്റെയും തെക്കന് കര്ണാടക തീരപ്രദേശങ്ങളുടെയും കാലാവസ്ഥയെ നേരിട്ട് ബാധിക്കാനിടയുണ്ടെന്ന് കാലാവസ്ഥാ വകുപ്പ് അറിയിച്ചു.