ശക്തി പ്രാപിച്ച് ന്യൂനമര്‍ദം; അഞ്ചു ദിവസം ഇടിമിന്നലോട് കൂടിയ മഴയ്ക്ക് സാധ്യത: 12 ജില്ലകളില്‍ യെല്ലോ അലേര്‍ട്ട്: വരും ദിവസങ്ങളില്‍ മഴയും ചൂടും ഇടകലര്‍ന്ന കാലാവസ്ഥ
അഞ്ചു ദിവസം ഇടിമിന്നലോട് കൂടിയ മഴയ്ക്ക് സാധ്യത
തിരുവനന്തപുരം: ബംഗാള്‍ ഉള്‍ക്കടലിനു മുകളില്‍ രൂപപ്പെട്ട ന്യൂനമര്‍ദത്തിന്റെ ശക്തി വര്‍ധിച്ചതോടെ ഇന്നു മുതല്‍ അഞ്ചു ദിവസത്തേക്കു കേരളത്തിലെ വിവിധ സ്ഥലങ്ങളില്‍ മിന്നലിന്റെ അകമ്പടിയോടെ ഇടത്തരം മഴയ്ക്ക് സാധ്യതയുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, കണ്ണൂര്‍, കാസര്‍കോട് ജില്ലകളില്‍ ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്കു സാധ്യതയുള്ളതിനാല്‍ ഇന്ന് യെലോ അലര്‍ട്ട് പ്രഖ്യാപിച്ചു.
സംസ്ഥാനത്ത് വരുന്ന ദിവസങ്ങളില്‍ മഴയും ചൂടും മാറി മാറിയുള്ള അന്തരീക്ഷത്തിനു സാധ്യതയെന്നു കാലാവസ്ഥാ വകുപ്പിന്റെ പ്രവചനം. അതേസമയം, ഇന്ന് പാലക്കാട്, കൊല്ലം, തൃശൂര്‍ ജില്ലകളില്‍ 37 ഡിഗ്രി സെല്‍ഷ്യസ് വരെയും തിരുവനന്തപുരം, പത്തനംതിട്ട, ആലപ്പുഴ, കോട്ടയം, എറണാകുളം, മലപ്പുറം, കോഴിക്കോട്, കണ്ണൂര്‍, കാസര്‍കോട് ജില്ലകളില്‍ 36 ഡിഗ്രി സെല്‍ഷ്യസ് വരെയും താപനില ഉയരാം. ഈ ജില്ലകളിലെ മലയോര മേഖലകളില്‍ ഒഴികെ ചൂടും ഈര്‍പ്പവും കലര്‍ന്ന കാലാവസ്ഥയായിരിക്കും.