അമേരിക്കയും ഇസ്രായേലും ഇപ്പോൾ ഇറാന്റെ മാത്രമല്ല..ലോകത്തിന്റെയാകെ ശത്രുക്കളായി മാറിയിരിക്കുന്നു; അവർ പിഞ്ചുകുഞ്ഞുങ്ങളെയാണ് കൊന്നത്; തുറന്നടിച്ച് എം സ്വരാജ്
തിരുവനന്തപുരം: പശ്ചിമേഷ്യയിലെ യുദ്ധസാഹചര്യത്തിൽ അമേരിക്കൻ-ഇസ്രായേൽ സൈനിക നീക്കങ്ങൾക്കെതിരെ കടുത്ത ഭാഷയിൽ പ്രതികരിച്ച് സിപിഎം നേതാവ് എം. സ്വരാജ്. സാമ്രാജ്യത്വത്തിന്റെ യുദ്ധക്കൊതി മാനവികതയ്ക്ക് ഭീഷണിയാണെന്നും ലോകം ഭയാനകമായ അശാന്തിയിലേക്ക് നീങ്ങുകയാണെന്നും അദ്ദേഹം ഫേസ്ബുക്കിൽ കുറിച്ചു.
ഇറാനിലെ പെൺകുട്ടികളുടെ സ്കൂളിന് നേരെയുണ്ടായ ആക്രമണവും കുഞ്ഞുങ്ങളുടെ ദാരുണമായ മരണവും ചൂണ്ടിക്കാട്ടിയ സ്വരാജ്, ഓരോ യുദ്ധവും ആദ്യം ഇല്ലാതാക്കുന്നത് സ്ത്രീകളെയും കുട്ടികളെയും നിസ്സഹായരെയുമാണെന്ന് ഓർമ്മിപ്പിച്ചു. ഇറാൻ ആണവായുധം നിർമ്മിക്കുന്നു എന്നാരോപിച്ച് നടത്തുന്ന ഈ ആക്രമണം വലിയൊരു ഫലിതമാണെന്ന് അദ്ദേഹം പരിഹസിച്ചു. ലോകത്താദ്യമായി ആണവായുധം പ്രയോഗിച്ചവരും ഇപ്പോഴും വൻതോതിൽ അത് കൈവശം വെച്ചിരിക്കുന്നവരുമാണ് ഈ വാദം ഉന്നയിക്കുന്നതെന്ന് അദ്ദേഹം കുറ്റപ്പെടുത്തി.
അമേരിക്കയും ഇസ്രായേലും ഇറാൻ്റെ മാത്രമല്ല, ലോകത്തിന്റെയാകെ ശത്രുക്കളായി മാറിയിരിക്കുകയാണെന്ന് സ്വരാജ് പറഞ്ഞു. മനുഷ്യവംശത്തിന്റെ ശത്രുക്കളായ സാമ്രാജ്യത്വ ശക്തികളുടെ യുദ്ധവെറിക്കെതിരെ ലോകമെങ്ങുമുള്ള മനുഷ്യർ അണിനിരക്കണമെന്ന് അദ്ദേഹം ആഹ്വാനം ചെയ്തു.
"കൊല്ലപ്പെടുന്ന ഓരോ മനുഷ്യനും നമ്മുടെ സഹോദരങ്ങളാണ്. കുഞ്ഞുങ്ങളുടെ ചോര പുരണ്ട സാമ്രാജ്യത്വ ശക്തികൾക്കെതിരെ ഓരോ തെരുവിലും സമാധാനത്തിൻ്റെ പതാകകൾ ഉയരണം." - സ്വരാജ് കുറിച്ചു. മാനവികതയുടെ മുദ്രാവാക്യങ്ങൾ ഉയർത്തിപ്പിടിച്ച് യുദ്ധഭീകരതയ്ക്കെതിരെ പ്രതികരിക്കണമെന്ന ആഹ്വാനത്തോടെയാണ് അദ്ദേഹം തന്റെ കുറിപ്പ് അവസാനിപ്പിച്ചത്.