ശശി തരൂര് എല്ഡിഎഫിലേക്ക് വരുമോ? സാങ്കല്പിക ചോദ്യങ്ങളോട് പ്രതികരിക്കാനില്ലെന്ന് എം വി ഗോവിന്ദന്റെ മറുപടി
ശശി തരൂര് എല്ഡിഎഫിലേക്ക് വരുമോ?
തിരുവനന്തപുരം: ശശി തരൂര് സിപിഎമ്മിനോട് അടുക്കുന്നുവെന്ന ചര്ച്ചയില് കാര്യമില്ലെന്ന് സിപിഎം സംസ്ഥാന സെക്രട്ടറി എം വി ഗോവിന്ദന്. ശശി തരൂരിനെ ഒപ്പം കൂട്ടാന് ദുബൈയിലെ വ്യവസായി വഴി സിപിഎം പാലമിട്ടെന്ന വിവരം ഇന്നലെയാണ് പുറത്തുവന്നത്. എന്നാല് തരൂര് ഇത് നിഷേധിച്ചു. സിപിഎം സംസ്ഥാന സെക്രട്ടറി എം വി ഗോവിന്ദന് ഇതേക്കുറിച്ചുള്ളത് സാങ്കല്പിക ചോദ്യമെന്നാണ് അദ്ദേഹം പ്രതികരിച്ചത്.
അതേസമയം, കൊച്ചിയില് കോണ്ഗ്രസിന്റെ മഹാപഞ്ചായത്തില് അവഗണിച്ചതില് കടുത്ത അതൃപ്തിയുള്ള തരൂര് മറ്റന്നാള് രാഹുല് ഗാന്ധിയെ കാണും. തരൂരിന്റെ അതൃപ്തി പരിഹരിക്കണമെന്നാണ് സംസ്ഥാനത്തെ നേതാക്കളുടെ അഭിപ്രായം.
മഹാപഞ്ചായത്ത് വേദിയില് രാഹുല് ഗാന്ധി കണ്ട ഭാവം നടിച്ചില്ല, പേരു പറഞ്ഞില്ല, പ്രവര്ത്തക സമിതി അംഗമായിട്ടും രാഹുല് വരുന്നതിന് മുമ്പേ പ്രസംഗിപ്പിച്ചു എന്ന പരാതിയാണ് തരൂരിനുള്ളത്. രാഹുല് ഗാന്ധി തന്നെ അപമാനിച്ചെന്ന് തരൂര് കോണ്ഗ്രസ് അധ്യക്ഷനോട് പരാതിപ്പെട്ടു.
അതൃപ്തിയിലുള്ള ശശി തരൂര് ഹൈക്കമാന്ഡ് വിളിച്ച ദില്ലി ചര്ച്ചയ്ക്ക് പോയില്ല. നാളത്തെ കെപിസിസി തെരഞ്ഞെടുപ്പ് സമിതിയിലും തരൂര് പങ്കെടുക്കില്ല.