തിയറ്ററിൽ സിനിമ കണ്ടുകൊണ്ടിരിക്കെ മോശമായി പെരുമാറി; പിന്നാലെ പോലീസ് കണ്‍ട്രോള്‍ റൂമിലേക്ക് കോൾ; പെൺകുട്ടിയുടെ പരാതിയിൽ യുവാവ് അറസ്റ്റിൽ
By : സ്വന്തം ലേഖകൻ
Update: 2025-05-03 14:04 GMT
കോഴിക്കോട്: തിയറ്ററിൽ വച്ച് സിനിമ കണ്ടുകൊണ്ടിരിക്കുമ്പോൾ പെണ്‍കുട്ടിയോട് മോശമായി പെരുമാറി എന്ന കേസിൽ യുവാവിനെ പോലീസ് പിടികൂടി. കോഴിക്കോട് വെള്ളയില്‍ സ്വദേശി നാലുകുടിപറമ്പില്‍ സി വി മന്‍സിലില്‍ താമസിക്കുന്ന ഇര്‍ഫാന്‍(18) ആണ് അറസ്റ്റിലായത്. കോടതിയില്‍ ഹാജരാക്കിയ ഇയാളെ റിമാൻഡ് ചെയ്തു.
സിനിമ കണ്ടുകൊണ്ടിരിക്കുകയായിരുന്ന പെണ്‍കുട്ടിയോട് ഇയാള്‍ വളരെ മോശം ഉദ്ദേശത്തോടെ പെരുമാറുകയായിരുന്നു. ഉടന്‍ തന്നെ പെണ്‍കുട്ടി പോലീസ് കണ്‍ട്രോള്‍ റൂമില്‍ വിവരം അറിയിക്കുകയായിരുന്നു.
ഇതുപ്രാകാരം കസബ എസ്‌ഐ സുനില്‍ കുമാര്‍, എഎസ്‌ഐമാരായ രജീഷ്, സജേഷ് കുമാര്‍, സീനിയര്‍ സിവില്‍ പോലീസ് ഓഫീസര്‍ രാജീവ് കുമാര്‍ പാലത്ത്, ലാല്‍ സിതാര എന്നിവര്‍ ചേര്‍ന്നാണ് ഇര്‍ഫാനെ പോലീസ് അറസ്റ്റ് ചെയ്തത്.