രഹസ്യ വിവരത്തിന്റെ അടിസ്ഥാനത്തിൽ പരിശോധന; തമിഴ്നാട് ട്രാൻസ്പോർട്ട് ബസിൽ എംഡിഎംഎ കടത്താൻ ശ്രമം; 79 ഗ്രാം വരെ പിടിച്ചെടുത്തു; പ്രാവച്ചമ്പലത്ത് യുവാവ് അറസ്റ്റിൽ

തിരുവനന്തപുരം: തമിഴ്നാട് ട്രാൻസ്പോർട്ട് ബസിൽ എംഡിഎംഎ കടത്താൻ ശ്രമിച്ച കേസിൽ യുവാവ് അറസ്റ്റിൽ. തിരുവനന്തപുരം നഗരത്തിലേക്ക് കടത്താൻ ശ്രമിക്കവെയാണ് പിടികൂടിയത്. നേമത്തിനടുത്ത് പ്രാവച്ചമ്പലത്ത് വച്ച് പൊലീസ് നടത്തിയ പരിശോധനയിലാണ് 79 ഗ്രാം എംഡിഎംഎയുമായി തിരുമല വേട്ടമുക്ക് സ്വദേശി അജിയെ(25) നേമം പോലീസ് അറസ്റ്റ് ചെയ്തത്.

മാർക്കറ്റിൽ 2.5 ലക്ഷത്തോളം രൂപ വില വരുന്നതാണെന്ന് പൊലീസ് പറഞ്ഞു. പൊലീസിന് ലഭിച്ച രഹസ്യ വിവരത്തെ തുടർന്ന് നാഗർകോവിലിൽ നിന്ന് തിരുവനന്തപുരത്തേക്ക് വരികയായിരുന്ന തമിഴ്നാട് ട്രാൻസ്പോർട്ട് ബസ് തടഞ്ഞ് നടത്തിയ പരിശോധനയിലാണ് ഇയാളെ അറസ്റ്റ് ചെയ്തത്. ഗൾഫിലായിരുന്ന ഇയാൾ നാട്ടിലെത്തി കാരിയറായി ജോലി നോക്കിയതാണെന്ന് നേമം പോലീസ് വ്യക്തമാക്കി. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.