ചങ്ങനാശ്ശേരി, തിരുവല്ല ഭാഗങ്ങളില്‍ കഞ്ചാവ് കച്ചവടം; അഞ്ചു കിലോ കഞ്ചാവുമായി യുവാവ് അറസ്റ്റില്‍
ചങ്ങനാശ്ശേരി, തിരുവല്ല ഭാഗങ്ങളില്‍ കഞ്ചാവ് കച്ചവടം; അഞ്ചു കിലോ കഞ്ചാവുമായി യുവാവ് അറസ്റ്റില്‍
കോട്ടയം: ചങ്ങനാശ്ശേരി, തിരുവല്ല ഭാഗങ്ങളില്‍ കഞ്ചാവ് മൊത്തക്കച്ചവടം നടത്തിവന്ന യുവാവിനെ ചങ്ങനാശ്ശേരി എക്‌സൈസ് ഇന്‍സ്‌പെക്ടര്‍ ടി.എസ്.പ്രമോദിന്റെ നേതൃത്വത്തിലുള്ള സംഘം പിടികൂടി. ശനിയാഴ്ച രാത്രി 7.30-ന് നാലുകോടി ഭാഗത്താണ്, വില്‍പ്പനയ്ക്കായി സൂക്ഷിച്ചിരുന്ന 500 ഗ്രാം കഞ്ചാവ് കണ്ടെടുത്തതിനെത്തുടര്‍ന്ന് തിരുവല്ല പെരുന്തുരുത്തി തെങ്ങനാംകുളം വീട്ടില്‍ ടി.കെ.വിഷ്ണുകുമാറിനെ (34) അറസ്റ്റുചെയ്തത്.
ഇയാള്‍ വാടകയ്ക്ക് താമസിച്ചിരുന്ന മല്ലപ്പള്ളി കുന്നന്താനം വള്ളമലയിലെ വള്ളിയാംകുന്ന് വീട്ടില്‍നിന്നും നാലുകിലോയിലധികം കഞ്ചാവ് പിടിച്ചെടുത്തു. പ്രതി മയക്കുമരുന്ന് മാഫിയയിലെ പ്രധാന കണ്ണിയാണെന്ന് എക്‌സൈസ് അധികൃതര്‍ അറിയിച്ചു. അസി. എക്‌സൈസ് ഇന്‍സ്‌പെക്ടര്‍ ഗ്രേഡ് പി.സജി, പ്രിവന്റീവ് ഓഫീസര്‍ ഗ്രേഡ് ടി.സന്തോഷ്, ആര്‍.രാജേഷ്, സിവില്‍ എക്‌സൈസ് ഓഫീസര്‍മാരായ രതീഷ്, പ്രവീണ്‍, വനിതാ സിവില്‍ എക്‌സൈസ് ഓഫീസര്‍ സോണിയ എന്നിവര്‍ ചേര്‍ന്നാണ് പ്രതിയെ പിടിച്ചത്.