പത്തനംതിട്ട പൈവഴിയില്‍ മണ്ണുമാന്തിയന്ത്രം മറിഞ്ഞ് അപകടം; ഇന്ന് പുതിയതായി ജോലിക്ക് കയറിയ തൊഴിലാളിക്ക് ദാരുണാന്ത്യം
പത്തനംതിട്ടയില്‍ മണ്ണുമാന്തി യന്ത്രം മറിഞ്ഞ് തൊഴിലാളി മരിച്ചു
പത്തനംതിട്ട: പത്തനംതിട്ട പൈവഴിയില്‍ മണ്ണുമാന്തി യന്ത്രം മറിഞ്ഞ് തൊഴിലാളി മരിച്ചു. പശ്ചിമബംഗാള്‍ സ്വദേശി സൂരജ് ആണ് മരിച്ചത്. മണ്ണുമാന്തി യന്ത്രത്തിലെ സഹായിയായിരുന്നു സൂരജ്. മൃതദേഹം പത്തനംതിട്ട ജനറല്‍ ആശുപത്രിയിലേക്ക് മാറ്റി. മറ്റൊരാള്‍ക്ക് അപകടത്തില്‍ പരിക്കേറ്റു.
മണ്ണെടുപ്പിനെതിരെ പ്രതിഷേധം ഉയരുന്ന കടലിക്കുന്ന് മലയില്‍ ആയിരുന്നു അപകടം. ദേശീയപാത നിര്‍മാണത്തിന് ആവശ്യമായ മണ്ണെടുപ്പ് നടക്കുന്നതിനിടെയാണ് അപകടം സംഭവിച്ചത്. ഉച്ചയ്ക്ക് 2.30ന് ആയിരുന്നു അപകടം. ഇന്ന് പുതിയതായി ജോലിയില്‍ പ്രവേശിച്ചയാളാണ് അപകടത്തില്‍പ്പെട്ടത്.
മണ്ണുമാന്തിയന്ത്രം നിയന്ത്രണം നഷ്ടപ്പെട്ട് മറിയുകയായിരുന്നു. ഇതിനിടയില്‍ അകപ്പെട്ട തൊഴിലാളിക്ക് സംഭവസ്ഥലത്തുവച്ചു തന്നെ ജീവന്‍ നഷ്ടമായി. ചെങ്ങന്നൂര്‍, അടൂര്‍ നിലയങ്ങളില്‍ നിന്നുള്ള അഗ്‌നിരക്ഷാ സംഘമെത്തി മൃതദേഹം പുറത്തെടുത്തു. ഇലവുംതിട്ട പൊലീസും സ്ഥലത്തെത്തിയിട്ടുണ്ട്. കരാര്‍ കമ്പനി ഉദ്യോഗസ്ഥര്‍ എത്തിയ ശേഷം തുടര്‍നടപടികള്‍ സ്വീകരിക്കുമെന്ന് പൊലീസ് അറിയിച്ചു.