കൊടുവള്ളിയില്‍ യുവാവിനെ സിനിമ സ്‌റ്റൈലില്‍ വീട്ടില്‍നിന്ന് തട്ടിക്കൊണ്ടുപോയെന്ന് പരാതി; വിദേശത്തെ സാമ്പത്തിക തര്‍ക്കമെന്ന് സൂചന; സ്വര്‍ണകടത്ത് സംഘവുമായി ബന്ധമുണ്ടോയെന്ന് അന്വേഷണം
കൊടുവള്ളിയില്‍ യുവാവിനെ സിനിമ സ്‌റ്റൈലില്‍ വീട്ടില്‍നിന്ന് തട്ടിക്കൊണ്ടു പോയി
കോഴിക്കോട്: കൊടുവള്ളിയില്‍ കാറിലെത്തിയ യുവാവിനെ സിനിമ സ്‌റ്റൈലില്‍ വീട്ടില്‍നിന്ന് തട്ടിക്കൊണ്ടു പോയി. കൊടുവള്ളി കിഴക്കോത്ത് സ്വദേശി റഷീദിന്റെ മകന്‍ അനൂസ് റോഷനെയാണ് തട്ടിക്കൊണ്ടു പോയത്. അനൂസ് റോഷന്‍ വിദ്യാര്‍ഥിയാണ്. ശനിയാഴ്ച വൈകീട്ട് നാലു മണിയോടെ ആയുധങ്ങളുമായി കാറില്‍ എത്തിയ സംഘം വീട്ടില്‍ നിന്നുമാണ് യുവാവിനെ തട്ടിക്കൊണ്ട് പോയത്. കെ.എല്‍ 65 എല്‍ 8306 നമ്പര്‍ കാറിലാണ് സംഘം എത്തിയതെന്ന് പറയുന്നു.
ഇവര്‍ കടന്നുകളയുന്നതിന്റെ ദൃശ്യം സമീപത്തെ അങ്ങാടിയിലെ സി.സി.ടി.വിയില്‍ പതിഞ്ഞിട്ടുണ്ട്. അനൂസ് റോഷന്റെ സഹോദരന്‍ അജ്മല്‍ റോഷന്‍ വിദേശത്താണ്. വിദേശത്ത് വെച്ചുണ്ടായ സാമ്പത്തിക ഇടപാടുകളുടെ ഭാഗമായിട്ടാണ് സഹോദരനെ തട്ടിക്കൊണ്ട് പോയെതെന്നാണ് നിഗമനം. സംഭവത്തില്‍ കൊടുവള്ളി പൊലീസ് അന്വേഷണം തുടങ്ങി. അതിനിടെ സ്വര്‍ണകടത്ത് സംഘവുമായി സംഘത്തിന് ബന്ധമുണ്ടോ എന്ന കാര്യവും പൊലീസ് അന്വേഷിക്കുന്നുണ്ട്.