കുടുംബത്തോടൊപ്പം മരത്തണലിലിരുന്ന് ഭക്ഷണം കഴിക്കുന്നതിനിടെ ശിഖരം ഒടിഞ്ഞു വീണു; 13 വയസ്സുകാരന് ദാരുണ മരണം: ഗുരുതര പരിക്കേറ്റ മറ്റൊരു കുട്ടി ആശുപത്രിയില്‍

കുലശേഖരം: കന്യാകുമാരിയില്‍ കുടുംബത്തോടൊപ്പം വിനോദ സഞ്ചാരത്തിനെത്തിയ 13 വയസ്സുകാരന്‍ മരത്തിന്റെ ശിഖരം ഒടിഞ്ഞു വീണു മരിച്ചു. കോതയാറിനു സമീപത്തെ തോട്ടത്തില്‍ കുടുംബത്തോടൊപ്പം ഭക്ഷണം കഴിക്കാനിരിക്കവെയാണ് അപകടം. മുംബൈയില്‍ താമസിക്കുന്ന നാഗര്‍കോവില്‍ കീഴപെരുവിള സ്വദേശി ഗാഡ്സന്‍ സാമുവലിന്റെ മകന്‍ മിത്രനാണ് മരിച്ചത്. ഗുരുതര പരിക്കേറ്റ മറ്റൊരു കുട്ടിയെ ആശുപത്രിയില്‍ പ്രവേശിപ്പിച്ചു.

കഴിഞ്ഞ ദിവസമാണ് ഭാര്യയും രണ്ടു മക്കളുമൊന്നിച്ച് ഗാഡ്സന്‍ കോതയാറിലെത്തിയത്. ഇവരോടൊപ്പം തെക്ക്താമരക്കുളത്തുള്ള ഒരു കുടുംബവും മുബൈയില്‍ നിന്നുള്ള നാലു കുടുംബങ്ങളുമാണ് മൂന്ന് കാറുകളിലും രണ്ട് ബൈക്കുകളിലുമായി കോതയാറിലെത്തിയത്. കന്യാകുമാരി ചുറ്റിക്കാണാനാണ് എല്ലാവരും എത്തിയത്. എന്നാല്‍ അപകടത്തിന് വഴിമാറുക ആയിരുന്നു.

എട്ടു കുട്ടികളുള്‍പ്പെടെ 20 പേരാണ് സംഘത്തിലുണ്ടായിരുന്നത്. ഒരു തോട്ടത്തിലെ മരത്തണലിലിരുന്നു ഭക്ഷണം കഴിക്കുമ്പോഴാണ് സംഭവം. ശിഖരം മുറിഞ്ഞു വീഴുന്നതു കണ്ടു എല്ലാവരും ചാടി രക്ഷപ്പെട്ടെങ്കിലും മിത്രനും മറ്റൊരു കുട്ടിയും ശിഖരങ്ങള്‍ക്കിടയില്‍പ്പെടുകയായിരുന്നു. ഗുരുതരപരുക്കേറ്റ ഇരുവരെയും കുലശേഖരത്തുള്ള സ്വകാര്യ ആശുപതിയില്‍ എത്തിച്ചെങ്കിലും മിത്രന്‍ മരിച്ചു.