ആശുപത്രിയിലേക്ക് കുതിച്ചുപാഞ്ഞ ആംബുലന്‍സിന് സൈഡ് നല്‍കാതെ വഴി മുടക്കി; ബൈക്ക് യാത്രികന് 5000 രൂപ പിഴ ചുമത്തി; കുളത്തില്‍ വീണ കുട്ടിയുടെ നില ഗുരുതരം
കണ്ണൂര്‍: കണ്ണൂരില്‍ ആംബുലന്‍സിന് സൈഡ് നല്‍കിയില്ലെന്ന് പരാതി. ബൈക്ക് യാത്രികനാണ് വഴി മുടക്കിയത്. കുളത്തില്‍ വീണ കുട്ടിയുമായി പോവുകയായിരുന്നു ആംബുലന്‍സ്. കുട്ടിയുടെ നില ഗുരുതരമായി തുടരുന്നതായാണ് വിവരം.
ആംബുലന്‍സിന് വഴി മുടക്കിയ ബൈക്ക് യാത്രികന് പൊലീസ് 5000 രൂപ പിഴ ചുമത്തി. താഴെ ചൊവ്വ സ്വദേശി കൗശിക്കിനെതിരെയാണ് നടപടി. ഇന്നലെ വൈകിട്ട് താഴെ ചൊവ്വയിലാണ് ബൈക്ക് ആംബുലന്‍സിന്റെ വഴിമുടക്കിയത്. വൈകീട്ട് പഴയങ്ങാടിയില്‍ നിന്നും കണ്ണൂരിലെ സ്വകാര്യ ആശുപത്രിയിലേക്ക് വരികയായിരുന്നു ആംബുലന്‍സ്.
കുളത്തില്‍ വീണ കുട്ടിയുമായി കണ്ണൂരിലെ ആശുപത്രിയിലേക്ക് പോവുകയായിരുന്നു ആംബുലന്‍സ്. സയറണ്‍ മുഴക്കിയിട്ടും സൈഡ് കൊടുക്കാത്തതിന്റെ ദൃശ്യങ്ങള്‍ പുറത്ത് വന്നിരുന്നു. കണ്ണൂര്‍ ട്രാഫിക് പൊലീസാണ് പിഴ ചുമത്തിയത്. ആശുപത്രിയില്‍ പ്രവേശിപ്പിച്ച കുട്ടിയുടെ നില ഗുരുതരമായി തുടരുന്നു.