അമ്മക്ക് വിദേശത്ത് ജോലി; മൂന്നാം ക്ലാസുകാരനെ തേപ്പുപെട്ടി കൊണ്ട് പൊള്ളിച്ച് രണ്ടാനച്ഛന്‍; കസ്റ്റഡിയിലെടുത്ത് പൊലീസ്

കൊല്ലം: മൂന്നാം ക്ലാസുകാരനെ തേപ്പുപെട്ടി കൊണ്ട് പൊള്ളലേല്‍പ്പിച്ച സംഭവത്തില്‍ രണ്ടാനച്ഛനെതിരെ കേസെടുത്ത് പൊലീസ്. കൊല്ലം തെക്കുംഭാഗത്ത് എട്ടുവയസുകാരനെ രണ്ടാനച്ഛന്‍ പൊള്ളലേല്‍പ്പിച്ചുവെന്നാണ് പുറത്തുവരുന്ന വിവരം. പരാതിയില്‍ അച്ഛനെ പൊലീസ് കസ്റ്റഡിയിലെടുക്കുകയായിരുന്നു. കുട്ടി വികൃതി കാട്ടിയത് കൊണ്ട് പൊള്ളിച്ചെന്നാണ് പൊലീസ് പറയുന്നത്.

കുട്ടിയുടെ അമ്മ വിദേശത്ത് ജോലി ചെയ്യുകയാണ്. മുത്തശ്ശിക്കും രണ്ടാനച്ഛനുമൊപ്പമാണ് കുട്ടി താമസിക്കുന്നത്. മുത്തശ്ശിയുമായി വികൃതി പിടിക്കുന്നതിനിടെ കുട്ടിയെ പൊള്ളിച്ചുവെന്നാണ് രണ്ടാനച്ഛന്റെ മൊഴിയിലുള്ളത്. മറ്റേതെങ്കിലും കാരണമുണ്ടോ എന്ന് പൊലീസ് അന്വേഷിച്ചുവരികയാണ്. വിഷയത്തില്‍ സിഡബ്ല്യുസിയും ഇടപെട്ടിട്ടുണ്ട്. കുട്ടിയുടെ സുരക്ഷ കണക്കിലെടുത്ത് സിഡബ്ല്യുസിയേക്ക് മാറ്റാനും സാധ്യതയുണ്ട്. ആലപ്പുഴ നൂറനാട് നാലു വയസുകാരന് രണ്ടാനച്ഛന്റേയും അമ്മയുടേയും മര്‍ദനമേറ്റതിന് പിന്നാലെയാണ് കൊല്ലത്തും സമാനരീതിയിലുള്ള ആക്രമണം.