രാഹുല്‍ മാങ്കൂട്ടത്തില്‍ നിയമസഭയില്‍ വന്നാല്‍ അദ്ദേഹത്തെ ആരും കൈയേറ്റം ചെയ്യാനൊന്നും പോകുന്നില്ലെ; ചിലപ്പോള്‍ ചിലര്‍ പൂവന്‍കോഴിയുടെ ശബ്ദം ഉണ്ടാക്കും; മുകേഷ് എഴുന്നേറ്റ് നിന്നാല്‍ യുഡിഎഫും ആ ശബ്ദം ഉണ്ടാക്കും; ശശീന്ദ്രന്‍ എഴുന്നേറ്റ് നില്‍ക്കുമ്പോള്‍ പൂച്ചയുടെ ശബ്ദം! കെ മുരളീധരന്‍ പറഞ്ഞത്
തിരുവനന്തപുരം: രാഹുല്‍ മാങ്കൂട്ടത്തില്‍ നിയമസഭയില്‍ വന്നാല്‍ അദ്ദേഹത്തെ ആരും കൈയേറ്റം ചെയ്യാനൊന്നും പോകുന്നില്ലെന്ന് കോണ്‍ഗ്രസ് നേതാവ് കെ. മുരളീധരന്‍. ചിലപ്പോള്‍ ചിലര്‍ പൂവന്‍കോഴിയുടെ ശബ്ദം ഉണ്ടാക്കുമായിരിക്കും. മുകേഷ് എഴുന്നേറ്റ് നിന്നാല്‍ യുഡിഎഫും ആ ശബ്ദം ഉണ്ടാക്കുമെന്ന് മുരളീധരന്‍ പറഞ്ഞു.
ശശീന്ദ്രന്‍ എഴുന്നേറ്റ് നില്‍ക്കുമ്പോള്‍ പൂച്ചയുടെ ശബ്ദം ഉണ്ടാകും. അങ്ങനെയുള്ള ചില ശബ്ദങ്ങള്‍ അല്ലാതെ മറ്റൊരു അനിഷ്ട സംഭവും ഉണ്ടാവില്ല. രാഹുലിനെതിരെ അന്വേഷണം നടക്കുന്നതിനു മുമ്പ് വിധി കല്‍പ്പിക്കേണ്ട കാര്യമില്ല. സര്‍ക്കാര്‍ അന്വേഷിക്കുന്നുണ്ടല്ലോ. ആ അന്വേഷണത്തെ ഒരുതരത്തിലും ചോദ്യം ചെയ്യുന്നില്ല. പക്ഷേ ഇതുവരെ ആരും രേഖാമൂലം പരാതി നല്‍കിയിട്ടില്ല. പരാതി വന്നാല്‍ അതൊക്കെ പരിശോധിക്കട്ടെ.
രാഹുല്‍ പാര്‍ട്ടിയില്‍നിന്ന് സസ്‌പെന്‍ഡ് ചെയ്യപ്പെട്ടു. ആ കാര്യങ്ങളിലൊക്കെ പാര്‍ട്ടി വ്യക്തമായ നയം സ്വീകരിച്ചിട്ടുണ്ട്. ഇതില്‍ കൂടുതല്‍ നടപടികള്‍ സ്വീകരിക്കേണ്ട ആവശ്യം ഇപ്പോള്‍ ഇല്ല. ബാക്കിയൊക്കെ സര്‍ക്കാരിന്റെ അന്വേഷണ റിപ്പോര്‍ട്ട് വന്നിട്ട് അതിന്റെ അടിസ്ഥാനത്തില്‍ പിന്നീട് സ്വീകരിക്കാം. ഇപ്പോള്‍ ഈ എടുത്ത നിലപാടില്‍നിന്ന് ഒരു ഇഞ്ച് പോലും പിന്നോട്ടുപോകേണ്ട ആവശ്യം പാര്‍ട്ടിക്കില്ലെന്നും മുരളീധരന്‍ പറഞ്ഞു.