തുള്ളിനന പോലുള്ള ജലസേചന രീതികള്‍ സംസ്ഥാനത്തിന്റെ ആവശ്യനുസരണം പദ്ധതിയിലൂടെ നടപ്പിലാക്കും; സൂക്ഷ്മ ജലസേചന പദ്ധതികള്‍ക്ക് 100 കോടിയുടെ പദ്ധതിയുമായി കൃഷി വകുപ്പ്
തിരുവനന്തപുരം: വേനല്‍ക്കാലത്ത് ഉണ്ടാകാറുള്ള ജലക്ഷാമം പരിഹരിക്കുന്നതിന് കൃഷി വകുപ്പിന്റെ നേതൃത്വത്തില്‍ നടപ്പാക്കുന്ന സൂക്ഷ്മ ജലസേചന പദ്ധതിയായ പ്രധാനമന്ത്രി രാഷ്ട്രീയ കൃഷി വികാസ് യോജന കൂടുതല്‍ ജനപങ്കാളിത്തം ഉറപ്പുവരുത്തി സംസ്ഥാനത്ത് കാര്യക്ഷമമായി നടപ്പിലാക്കണമെന്ന് കാര്‍ഷികോത്പാദന കമ്മീഷണര്‍ ഡോ. ബി അശോക് പറഞ്ഞു.
ഓരോ തുള്ളിയിലും കൂടുതല്‍ വിളവ് ഉറപ്പാക്കുന്നതിനായി സംസ്ഥാനത്ത് നടപ്പിലാക്കുന്ന പദ്ധതിയുമായി ബന്ധപ്പെട്ട് തിരുവനന്തപുരം ഗ്രാന്‍ഡ് ചൈത്രം ഹോട്ടലില്‍ സംഘടിപ്പിച്ച പഠനശാല ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ആവശ്യത്തിന് മഴ ലഭിക്കുന്ന സംസ്ഥാനമാണെങ്കില്‍ പോലും പ്രതിശീര്‍ഷ ജലലഭ്യത താരതമ്യേനെ കുറവായതിനാല്‍ സൂക്ഷ്മ ജലശേഖരണ രീതികളുടെ പ്രാധാന്യം വര്‍ദ്ധിച്ചു വരികയാണെന്ന് ചടങ്ങില്‍ അധ്യക്ഷനായിരുന്ന കൃഷി വകുപ്പ് ഡയറക്ടര്‍ ഡോ. ശ്രീറാം വെങ്കിട്ടരാമന്‍ ചൂണ്ടിക്കാട്ടി. നാളികേരം, വാഴ, കശുമാവ് പുഷ്പ-ഔഷധ സസ്യങ്ങള്‍ തുടങ്ങി കേരളത്തിലെ ഒട്ടുമിക്ക പ്രധാനപ്പെട്ട വിളകളിലും സൂക്ഷ്മ ജലസേചന രീതികള്‍ ക്ലസ്റ്റര്‍ അടിസ്ഥാനത്തില്‍ നടപ്പിലാക്കി സംസ്ഥാനത്തിന് ഈ മേഖലയില്‍ മുന്നേറാനാകുമെന്നും അദ്ദേഹം പറഞ്ഞു. പദ്ധതിയുടെ ലഘു മാര്‍ഗ്ഗരേഖ കാര്‍ഷികോത്പാദന കമ്മീഷണര്‍ കൃഷി വകുപ്പ് ഡയറക്ടര്‍ക്ക് നല്‍കി പ്രകാശനം ചെയ്തു.
ജലസേചനത്തിന് ആവശ്യമായ കുളവും ടാങ്കുകളും മറ്റ് അടിസ്ഥാന സൗകര്യങ്ങളും ക്ലസ്റ്റര്‍ അടിസ്ഥാനത്തില്‍ സര്‍ക്കാര്‍-സ്വകാര്യ സ്ഥാപനങ്ങളുടെ സഹകരണത്തോടെ നടപ്പിലാക്കി ഭാവിയില്‍ പദ്ധതി മാര്‍ഗരേഖയില്‍ ആവശ്യമായ മാറ്റങ്ങള്‍ വരുത്തി തുള്ളിനന പോലുള്ള ജലസേചന രീതികള്‍ സംസ്ഥാനത്തിന്റെ ആവശ്യനുസരണം പദ്ധതിയിലൂടെ നടപ്പിലാക്കും. 6,000 ത്തോളം കര്‍ഷകരെ പദ്ധതിയില്‍ ഉള്‍പ്പെടുത്തി 70 ശതമാനം ജലനഷ്ടം കുറച്ചുകൊണ്ട് കൃഷി ലാഭകരമാക്കാനാണ് പദ്ധതി ലക്ഷ്യമിടുന്നത്. സംസ്ഥാന കൃഷി വകുപ്പ് മുഖേന തുള്ളി നന പദ്ധതികള്‍ക്ക് അപേക്ഷ സമര്‍പ്പിക്കാം.
ജലസേചനത്തിന്റെ പ്രാധാന്യത്തെകുറിച്ച് കര്‍ഷകരെ ബോധവത്കരിക്കുന്നതിലൂടെ ഈ പദ്ധതി കൂടുതല്‍ കാര്യക്ഷമമായി നടപ്പിലാക്കാന്‍ സാധിക്കുമെന്നും സ്വാഗതം ആശംസിച്ച കൃഷിവകുപ്പ് സംസ്ഥാന കാര്‍ഷിക എന്‍ജിനീയര്‍, രാജ്മോഹന്‍. സി.കെ പറഞ്ഞു. പഞ്ചായത്ത് തലത്തില്‍ കര്‍ഷകര്‍ക്ക് ഇത് സംബന്ധിച്ച പരിശീലനം നല്‍കുന്നതുമായി ബന്ധപ്പെട്ട് വിദഗ്ധര്‍ ക്‌ളാസ്സുകള്‍ കൈകാര്യം ചെയ്തു. കേരള കാര്‍ഷിക സര്‍വകലാശാല പ്രൊഫ. ഡോ. അബ്ദുള്‍ ഹക്കിം വി എം, വയനാട് കൃഷി അസിസ്റ്റന്റ് എന്‍ജിനീയര്‍ രാജേഷ് പി ഡി, കൃഷി അസിസ്റ്റന്റ് ഡയറക്ടര്‍ പ്രമോദ് എസ്., കൃഷി വകുപ്പ് അസിസ്റ്റന്റ് എന്‍ജിനീയര്‍ അരുള്‍ രാജ്, ബിറ്റ്‌സ് പിലാനി ഡിസൈന്‍ കണ്‍സള്‍ട്ടന്റ് ഡോ. പ്രകാശ് മോഹന്‍ എന്നിവര്‍ വിവിധ വിഷയങ്ങള്‍ കൈകാര്യം ചെയ്തു.