വീടിനുമുന്നില്‍ വാഹനം പാര്‍ക്ക് ചെയ്തതിന്റെ പേരില്‍ തര്‍ക്കം; പിക്കപ്പ് വാന്‍ ഡ്രൈവറെ മര്‍ദ്ദിച്ചു; പൊലീസ് ഡ്രൈവര്‍ക്കെതിരെ കേസെടുത്തു
പത്തനംതിട്ട: റാന്നിയില്‍ വീടിനുമുന്നില്‍ വാഹനം പാര്‍ക്ക് ചെയ്തതിന്റെ പേരിലുണ്ടായ തര്‍ക്കത്തിനിടെ പിക്കപ്പ് വാന്‍ ഡ്രൈവറെ മര്‍ദ്ദിച്ച പൊലീസ് ഡ്രൈവര്‍ക്കെതിരെ കേസെടുത്തു. പത്തനംതിട്ട സ്വദേശി മുനീര്‍ മുഹമ്മദിനാണ് മര്‍ദ്ദനമേറ്റത്. ചിറ്റാര്‍ സ്റ്റേഷനിലെ പൊലീസ് ഡ്രൈവര്‍ റാഫി മീര, ഭാര്യ ഷീജ റാഫി എന്നിവര്‍ക്കെതിരെ റാന്നി പൊലീസ് കേസെടുത്തു. റാഫിയും ഷീജയും മുനീറിനെ അസഭ്യം പറഞ്ഞെന്നും പരാതിയിലുണ്ട്.
കഴിഞ്ഞ വെള്ളിയാഴ്ച ഉച്ചതിരിഞ്ഞ് മൂന്നുമണിയോടെയാണ് സംഭവം. പുനലൂര്‍ - മൂവാറ്റുപുഴ റോഡില്‍ റാന്നി മന്ദിരം പടിക്ക് സമീപം പ്രവര്‍ത്തിക്കുന്ന കടയിലേക്ക് ഐസ്‌ക്രീമുമായി വന്നതാണ് മുനീര്‍ മുഹമ്മദ്. ഐസ്‌ക്രീം നല്‍കി മടങ്ങാനൊരുങ്ങുമ്പോള്‍ കടയ്ക്ക് തൊട്ടടുത്ത് താമസിക്കുന്ന റാഫിയും ഭാര്യയും തര്‍ക്കവുമായി എത്തുകയായിരുന്നു.
വീടിനുമുന്നില്‍ നിന്ന് വാഹനം മാറ്റണമെന്നായിരുന്നു ആവശ്യം. വാഹനം നീക്കാന്‍ ഒരുങ്ങിയപ്പോള്‍ റാഫി പുറകില്‍ ചെന്ന് നിന്ന് തടസ്സപ്പെടുത്തി. തുടര്‍ന്ന് പ്രകോപിതനായെത്തി മുനീര്‍ മുഹമ്മദിനെ മര്‍ദിക്കുകയായിരുന്നു. ഹോട്ടല്‍ ഉടമയും പ്രതി റാഫിയും തമ്മില്‍ മുന്‍പേ തര്‍ക്കങ്ങള്‍ നിലനിന്നിരുന്നതായാണ് സൂചന.