അതിസമ്പന്ന രാജ്യങ്ങളുടെ ഇരുപതിലൊന്ന് പോലുമില്ലാത്ത കേരളമാണ് ഈ നേട്ടംകൊയ്യുന്നത്; ദാരിദ്രമുക്ത കേരളം: അഭിനന്ദിച്ച് മമ്മൂട്ടി
തിരുവനന്തപുരം: ദാരിദ്ര്യത്തെ നേരിടാന്‍ തോളോട് തോള്‍ ചേര്‍ന്ന് പോരാടണമെന്ന് നടന്‍ മമ്മൂട്ടി. വിശക്കുന്ന വയറുകള്‍ കൂടി കണ്ടുകൊണ്ടാകണം വികസനം പൂര്‍ത്തീകരിക്കേണ്ടത്. അതിദാരിദ്ര്യമുക്ത കേരളം എന്ന പ്രഖ്യാപനത്തിന്റെ സന്തോഷം അതിന്റെ മാതൃകയാകട്ടെയെന്നും മമ്മൂട്ടി പറഞ്ഞു. അതിദാരിദ്ര്യമുക്ത കേരളം പ്രഖ്യാപന ചടങ്ങില്‍ വിശിഷ്ടാതിഥിയായി പങ്കെടുത്ത് സംസാരിക്കുകായിരുന്നു അദ്ദേഹം.
കേരളത്തിന്റെ സാമൂഹിക സൂചികകള്‍ പലപ്പോഴും ലോകത്തെ അമ്പരിപ്പിച്ചിട്ടുണ്ട്. ലോകത്തിലെ അതിസമ്പന്ന രാജ്യങ്ങളുടെ ഇരുപതിലൊരു ഭാഗം പോലുമില്ലാത്ത കേരളമാണ് ഇത്രയും വലിയ നേട്ടങ്ങള്‍ കൊയ്യുന്നത്. ഒരുപാട് സാമൂഹ്യസേവന മേഖലയില്‍ നാം മുന്നിലാണ്.
അതിദാരിദ്ര്യമുക്ത സംസ്ഥാനമായി കേരളത്തെ പ്രഖ്യാപിക്കുമ്പോള്‍, അതിനേക്കാള്‍ വലിയ ഉത്തരവാദിത്തമാണ് മുഖ്യമന്ത്രി പിണറായി വിജയന്‍ ഏറ്റെടുത്തിരിക്കുന്നതെന്നും മമ്മൂട്ടി പറഞ്ഞു. അതിദാരിദ്ര്യത്തില്‍നിന്ന് മാത്രമേ നാം മുക്തമായിട്ടുള്ളൂ, ദാരിദ്ര്യം ഇനിയും ബാക്കിയാണ്. ഒരുപാട് പ്രതിസന്ധികളെ കേരളം അതിജീവിച്ചു. പരസ്പര സ്‌നേഹവും പരസ്പര വിശ്വാസവും അതിര്‍വരമ്പില്ലാത്ത സാഹോദര്യവുമാണ് നമ്മളെ ഇവിടെ വരെ എത്തിച്ചത്.
ജനങ്ങള്‍ ഏല്‍പ്പിച്ച ഉത്തരവാദിത്തം വിശ്വാസപൂര്‍വം സര്‍ക്കാര്‍ നിര്‍വഹിക്കുമെന്ന് തന്നെയാണ് വിശ്വസിക്കുന്നത്. അതിന് ജനങ്ങളുടെ സമര്‍പ്പണവുമുണ്ടാകണം. രാജപാതകളും വലിയ കെട്ടിടങ്ങളും നിര്‍മിക്കുന്നത് കൊണ്ട് മാത്രം വികസിക്കപ്പെടില്ല. വികസിക്കേണ്ടത് നമ്മുടെ സാമൂഹ്യജീവിതമാണ്. അതിന് ദാരിദ്ര്യം പരിപൂര്‍ണമായും തുടച്ചുനീക്കപ്പെടണം.
പൊതുവേദിയിലോ നാട്ടിലോ എട്ട് മാസത്തോളമായി ഇറങ്ങാറില്ല. ഇപ്പോള്‍ നോക്കിയപ്പോള്‍ ഈ കാലത്ത് ഒരുപാട് കണ്ണഞ്ചിപ്പിക്കുന്ന വികസനമുണ്ടായിട്ടുണ്ടെന്നും മമ്മൂട്ടി പറഞ്ഞു.
അതിദാരിദ്ര്യ നിര്‍മാര്‍ജനപദ്ധതിയുടെ റിപ്പോര്‍ട്ട് മുഖ്യമന്ത്രി പിണറായി വിജയനില്‍നിന്ന് മമ്മൂട്ടി ഏറ്റുവാങ്ങി. സംസ്ഥാന സര്‍ക്കാരിന്റെ ഉപഹാരവും മമ്മൂട്ടിക്ക് മുഖ്യമന്ത്രി നല്‍കി.