സംരംഭകത്വ അഭിനിവേശം പരിപോഷിപ്പിക്കും; യങ് ഇന്നൊവേറ്റേഴ്‌സ് പ്രോഗ്രാമിലൂടെ വിദ്യാര്‍ത്ഥികള്‍ക്ക് നല്‍കിയത് 3.13 കോടി: മന്ത്രി ഡോ. ആര്‍ ബിന്ദു
തിരുവനന്തപുരം: ഹൈസ്‌കൂള്‍ മുതല്‍ ഗവേഷണതലം വരെയുള്ള വിദ്യാര്‍ഥികളില്‍ ഇന്നൊവേഷന്‍ സംസ്‌ക്കാരം വളര്‍ത്തിയെടുക്കാനായി നടപ്പിലാക്കുന്ന യങ് ഇന്നൊവേറ്റേഴ്‌സ് പ്രോഗ്രാമിലൂടെ കഴിഞ്ഞ വര്‍ഷങ്ങളില്‍ 3.13 കോടി രൂപ നല്‍കിയതായി ഉന്നതവിദ്യാഭ്യാസ മന്ത്രി ഡോ. ആര്‍ ബിന്ദു. യങ് ഇന്നൊവേറ്റേഴ്‌സ് പ്രോഗ്രാമിന്റെ ഭാഗമായി വട്ടിയൂര്‍ക്കാവ് സെന്‍ട്രല്‍ പോളിടെക്‌നിക് കോളേജില്‍ നടന്ന സ്റ്റേറ്റ് ഇന്നൊവേറ്റേഴ്‌സ് മീറ്റ് ഉദ്ഘാടനം ചെയ്തു സംസാരിക്കുകയായിരുന്നു മന്ത്രി.
മനുഷ്യജീവിതത്തിന്റെ അടിസ്ഥാന മേഖലകളായ കൃഷി, വ്യവസായം, ആരോഗ്യം, മാലിന്യ സംസ്‌കരണം തുടങ്ങിയവയിലെ ഒട്ടേറെ പ്രശ്‌നങ്ങള്‍ക്ക് പരിഹാരം നിര്‍ദേശിക്കാന്‍ യുവ വിദ്യാര്‍ത്ഥികള്‍ മുന്നോട്ട് വരുന്നത് ഏറെ അഭിനന്ദനീയമാണ്. കഴിഞ്ഞവര്‍ഷം കേരള ടെക്‌നിക്കല്‍ യൂണിവേഴ്‌സിറ്റി ആയിരം പ്രോജക്ടുകളാണ് തദ്ദേശ സ്വയംഭരണ സ്ഥാപനങ്ങളുമായി ബന്ധപ്പെട്ട് ഏറ്റെടുത്തത് മാലിന്യ സംസ്‌കരണം ഉള്‍പ്പെടെയുള്ള ഒട്ടേറെ പ്രശ്‌നങ്ങള്‍ക്ക് പരിഹാരം കണ്ടെത്തിയത്.
സംരംഭകത്വ അഭിനിവേശം പരിപോഷിപ്പിക്കാനായി കെഡിസ്‌ക്, കേരള നോളഡ്ജ് ഇക്കോണമി മിഷന്‍, കേരള സ്റ്റാര്‍ട്ടപ്പ് മിഷന്‍ എന്നിവയെല്ലാം കൈകോര്‍ത്തു പിടിച്ച് പ്രവര്‍ത്തിക്കുന്നുണ്ട്. വിദ്യാര്‍ത്ഥികള്‍ക്ക് ആശയവ്യക്തതയും ദിശാബോധവും പകര്‍ന്നുകൊണ്ട് വര്‍ത്തമാനകാല സാഹചര്യങ്ങളില്‍ സമൂഹം അഭിമുഖീകരിക്കുന്ന ഓരോ പ്രശ്‌നത്തിനും പരിഹാരം കാണാനുള്ള അന്തരീക്ഷം ഒരുക്കിയിട്ടുണ്ട്.
എല്ലാ കലാലയങ്ങളിലും പോളിടെക്‌നിക്കുകളിലും നൂതനാശയങ്ങളെ പ്രോത്സാഹിപ്പിച്ചുകൊണ്ട് ഇന്നൊവേഷന്‍ ഇന്‍ക്യുബേഷന്‍ സ്റ്റാര്‍ട്ടപ് അന്തരീക്ഷം ഉണ്ടാക്കിയെടുക്കണം എന്നുള്ള നിര്‍ദേശം വ്യാപകമായ നിലയില്‍ നല്‍കി കഴിഞ്ഞു. എല്ലാ പോളിടെക്‌നിക് കോളേജുകളിലും യങ് ഇന്നൊവേറ്റേഴ്‌സ് ക്ലബ്ബുകളും രൂപീകരിക്കാനായി.
തൊഴില്‍ അന്വേഷകരില്‍ നിന്ന് തൊഴില്‍ ദായകരും തൊഴില്‍ സൃഷ്ടാക്കളുമായി മാറാന്‍ യുവതീ യുവാക്കളെ സജ്ജരാക്കുകയാണ് വിജ്ഞാന കേരളം പദ്ധതിയിലൂടെയും ഇത്തരത്തിലുള്ള സംരംഭങ്ങളിലൂടെയും ലക്ഷ്യമിടുന്നത്. തൊഴിലും വിദ്യാഭ്യാസവും തമ്മിലുള്ള സ്‌കില്‍ ഗ്യാപ് നികത്താന്‍ ഇത് സഹായിക്കും. കുട്ടികളുടെ ജിജ്ഞാസയാണ് അറിവന്വേഷണത്തിന്റെ ഉത്തോലകം. ആ ജിജ്ഞാസയെ കെട്ടഴിച്ചു വിടാന്‍ പാകത്തില്‍ പ്രചോദനം പകരുകയാണ് അധ്യാപകരുടെ ദൗത്യം. ആ റോളിലേക്ക് മാറാന്‍ അധ്യാപകര്‍ തയ്യാറാകാന്‍ തുടങ്ങുന്നിടത്ത് മാത്രമേ പ്രതീക്ഷിക്കുന്ന രീതിയിലുള്ള മാറ്റം നമുക്ക് സൃഷ്ടിക്കാനാകൂ എന്നും മന്ത്രി പറഞ്ഞു.
യങ് ഇന്നൊവേറ്റേഴ്‌സ് പ്രോഗ്രാമില്‍ ഉന്നത നേട്ടം കൈവരിച്ച ജില്ലകള്‍ക്കും വിദ്യാഭ്യാസ സ്ഥാപങ്ങള്‍ക്കും അദ്ധ്യാപകര്‍ക്കും മന്ത്രി സമ്മാനങ്ങള്‍ വിതരണം ചെയ്തു. വി കെ പ്രശാന്ത് എംഎല്‍എ അദ്ധ്യക്ഷനായ ചടങ്ങില്‍ കെ ഡിസ്‌ക് മെമ്പര്‍ സെക്രട്ടറി പി വി ഉണ്ണിക്കൃഷ്ണന്‍, എക്‌സിക്യുട്ടീവ് ഡയറക്ടര്‍ സുധീപ് നായര്‍, സെന്‍ട്രല്‍ പോളിടെക്‌നിക് കോളേജ് പ്രിന്‍സിപ്പല്‍ ബീന എല്‍ എസ് തുടങ്ങിയവര്‍ സംബന്ധിച്ചു.