ശബരിമലയില്‍ അന്നദാനത്തിന് ചൊവ്വാഴ്ച മുതല്‍ സദ്യ; വിളമ്പുന്നത് സ്റ്റീല്‍ പാത്രങ്ങളില്‍
ശബരിമലയില്‍ അന്നദാനത്തിന് ചൊവ്വാഴ്ച മുതല്‍ സദ്യ
ശബരിമല: സന്നിധാനത്ത് ചൊവ്വാഴ്ച മുതല്‍ അന്നദാനത്തിന് സദ്യയായിരിക്കുമെന്ന് തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് കെ. ജയകുമാര്‍ അറിയിച്ചു. ഇലയ്ക്ക് പകരം സ്റ്റീല്‍പാത്രങ്ങളിലാവും സദ്യ വിളമ്പുക. കുടിവെള്ളത്തിന് സ്റ്റീല്‍ഗ്ലാസ് ഉപയോഗിക്കും. ഇലയില്‍ നല്‍കാനാണ് ആലോചിച്ചിരുന്നതെങ്കിലും, അത് ലഭ്യമാക്കുക എളുപ്പമല്ല. ഉപയോഗിച്ചുകഴിഞ്ഞാല്‍ നശിപ്പിക്കലും പ്രയാസമാണ്. ഇന്‍സിനറേറ്റര്‍ ഉപയോഗിക്കാന്‍ പറ്റില്ല, അതും കേടാകും. അതിനാലാണ് കുഴികളുള്ള പാത്രങ്ങള്‍ തീരുമാനിച്ചത്.
ഇത് നടപ്പാക്കാന്‍ പ്രായോഗികമായ കുറെ ബുദ്ധിമുട്ടുകളുണ്ട്. അതെല്ലാം പരിഹരിക്കും. ശനിയാഴ്ചത്തെ ബോര്‍ഡ് യോഗത്തില്‍ ഇക്കാര്യം വീണ്ടും ചര്‍ച്ചചെയ്യുമെന്നും അദ്ദേഹം പറഞ്ഞു. പാത്രങ്ങള്‍ ആവശ്യത്തിനുള്ളവ ലഭ്യമാക്കാന്‍ നടപടിയായി. സദ്യയാക്കുമ്പോള്‍ ആവശ്യത്തിന് ജീവനക്കാര്‍ വേണം. സദ്യ വിളമ്പി പരിചയമുള്ളവര്‍ വേണം. അതിനെക്കുറിച്ചും ആലോചിക്കുന്നുണ്ട്.
ചോറ്, പരിപ്പ്, സാമ്പാര്‍, അവിയല്‍, അച്ചാര്‍, തോരന്‍, പപ്പടം, പായസം തുടങ്ങി ഏഴ് വിഭവം എന്തായാലും ഉണ്ടാകും. പായസം ഓരോ ദിവസവും മാറ്റാനും ആലോചിക്കുന്നു. നിലവില്‍ 4000 പേരാണ് ദിവസവും അന്നദാനത്തില്‍ പങ്കെടുക്കുന്നത്. ഇത് സദ്യയാക്കിയാല്‍ എണ്ണം കൂടാനിടയുണ്ട്. അതുകൂടി കണക്കിലെടുത്തുകൊണ്ടാണ് ക്രമീകരണങ്ങളെന്നും ജയകുമാര്‍ പറഞ്ഞു.