ഇടതുപക്ഷം അനിവാര്യമാണെന്ന് ജനം തിരിച്ചറിയുക തന്നെ ചെയ്യുമെന്ന് കെ.കെ. ശൈലജ
മട്ടന്നൂര്: തെരഞ്ഞെടുപ്പ് ജനവിധി എല്.ഡി.എഫ് പ്രതീക്ഷിച്ച അത്രയും അനുകൂലമായില്ലെന്ന് സി.പി.എം നേതാവ് കെ.കെ. ശൈലജ എം.എല്.എ. എല്.ഡി.എഫിന്റെ വിജയത്തിനു വേണ്ടി പ്രവര്ത്തിച്ച എല്ലാവര്ക്കും അഭിവാദ്യങ്ങള്. കേരളത്തിന്റെ വികസനത്തിനും ക്ഷേമത്തിനും മതേതര സമൂഹത്തിന്റെ നിലനില്പിനും ഇടതുപക്ഷം അനിവാര്യമാണെന്ന് ജനങ്ങള് തിരിച്ചറിയുക തന്നെ ചെയ്യുമെന്നും അവര് ഫേസ്ബുക് കുറിപ്പില് പറഞ്ഞു.
'ജനങ്ങള്ക്ക് വേണ്ടി എല്.ഡി.എഫ് നടത്തുന്ന പ്രവര്ത്തനങ്ങള് തുടര്ന്നുകൊണ്ട് എന്നും ജനങ്ങളോടൊപ്പമുണ്ടാകും. എല്.ഡി.എഫിന്റെ വിജയത്തിനു വേണ്ടി പ്രവര്ത്തിച്ച എല്ലാവര്ക്കും അഭിവാദ്യങ്ങള്. വിജയികള്ക്ക് അനുമോദനങ്ങള്' -ശൈലജ പറഞ്ഞു.
തദ്ദേശ തെരഞ്ഞെടുപ്പില് ഇടതു മുന്നണി പ്രതീക്ഷിച്ച ഫലമല്ല ഉണ്ടായതെന്ന് മുഖ്യമന്ത്രി പിണറായി വിജയനും പ്രതികരിച്ചു. 'സംസ്ഥാനത്ത് മുഴുവന് മികച്ച വിജയം പ്രതീക്ഷിച്ചിരുന്നു. എന്നാല് ആ രീതിയിലുള്ള മുന്നേറ്റം ഉണ്ടാക്കാന് കഴിഞ്ഞിട്ടില്ല. അതിന്റെ കാരണങ്ങള് വിശദമായി പരിശോധിച്ച് ആവശ്യമായ തിരുത്തലുകള് വരുത്തി മുന്നോട്ടുപോകും' -മുഖ്യമന്ത്രി വ്യക്തമാക്കി.
തലസ്ഥാന നഗരത്തില് എന്.ഡി.എക്ക് മേല്ക്കൈ നേടാനായതും തെരഞ്ഞെടുപ്പ് പ്രചാരണത്തില് വര്ഗീയതയുടെ സ്വാധീനം ഉണ്ടായതും മതനിരപേക്ഷതയില് വിശ്വസിക്കുന്നവരെ ആശങ്കപ്പെടുത്തുന്നതാണ്. വര്ഗീയ ശക്തികളുടെ ദുഷ്പ്രചാരണങ്ങളിലും കുടിലതന്ത്രങ്ങളിലും ജനങ്ങള് അകപ്പെട്ടു പോകാതിരിക്കാനുള്ള ജാഗ്രത ഇനിയും ശക്തമാക്കേണ്ടതുണ്ട് എന്ന മുന്നറിയിപ്പാണ് ഈ തെരഞ്ഞെടുപ്പ് ഫലം നല്കുന്നതെന്നും മുഖ്യമന്ത്രി പറഞ്ഞു.
എല്ലാത്തരം വര്ഗീയതക്കും എതിരായ പോരാട്ടം കൂടുതല് ശക്തമായി തുടരേണ്ടതിന്റെ ആവശ്യകതക്കും ഈ ഫലം അടിവരയിടുന്നുണ്ട്. അത്തരം എല്ലാ കാര്യങ്ങളും വിശദമായി പരിശോധിച്ച് ജനങ്ങളുടെ ആകെ പിന്തുണ ആര്ജിച്ചു മുന്നോട്ടു പോകാനുള്ള ചര്ച്ചകളിലേക്കും തീരുമാനങ്ങളിലേക്കും ഇടതുപക്ഷ മുന്നണി വരും നാളുകളില് കടക്കും.
എല്.ഡി.എഫിന്റെ അടിത്തറ കൂടുതല് ഭദ്രമാക്കാനും ഇടതുപക്ഷ ജനാധിപത്യ മുന്നണി സര്ക്കാരിന്റെ വികസന-ജനക്ഷേമ പദ്ധതികള്ക്കുള്ള ജന പിന്തുണ വര്ധിപ്പിക്കാനും പ്രതിജ്ഞാബദ്ധമായി പ്രവര്ത്തിക്കുമെന്നും മുഖ്യമന്ത്രി കൂട്ടിച്ചേര്ത്തു.