പിഞ്ചുകുഞ്ഞിനെ ആനയുടെ കൊമ്പിലിരുത്തി പാപ്പാന്മാരുടെ സാഹസം; ദേവസ്വം പാപ്പാന് പിന്നാലെ കുട്ടിയുടെ അച്ഛനും അറസ്റ്റില്
ആലപ്പുഴ: ആലപ്പുഴ ഹരിപ്പാട് ആനയുടെ കൊമ്പില് നിന്ന് പിഞ്ചുകുഞ്ഞ് നിലത്തുവീണ സംഭവത്തില് ആനയുടെ പാപ്പാനും കുട്ടിയുടെ പിതാവുമായ കൊട്ടിയം സ്വദേശി അഭിലാഷ് അറസ്റ്റില്. പെരുമ്പാവൂരില് നിന്ന് ഇയാളെ ഹരിപ്പാട് പൊലീസ് പിടികൂടുകയായിരുന്നു. ഇയാള് ആനയുടെ താത്കാലിക പാപ്പാന് ആണ്. സംഭവത്തില് ദേവസ്വം പാപ്പാന് ജിതിന് രാജിനെ കഴിഞ്ഞദിവസം കസ്റ്റഡിയിലെടുത്തിരുന്നു. ഹരിപ്പാട് പൊലീസ് സ്വമേധയാ എടുത്ത കേസിലാണ് അറസ്റ്റ്.
കുഞ്ഞിന്റെ പേടി മാറ്റാനെന്ന പേരിലാണ് ആറ് മാസം പ്രായമുള്ള കുഞ്ഞുമായി ആനയ്ക്കരികില് പാപ്പാന്മാര് സാഹസം നടത്തിയത്. മൃഗങ്ങളെ ഉപയോഗിച്ചുള്ള ആക്രമണം, ജീവഹാനിക്കിടയാക്കുന്ന പ്രവര്ത്തനം എന്നീ വകുപ്പുകള് ചേര്ത്താണ് പാപ്പാന് ജിതിനെ ഇന്നലെ കസ്റ്റഡിയിലെടുത്തത്. ജുവനൈല് ജസ്റ്റിസ് പ്രകാരവും കേസ് രജിസ്റ്റര് ചെയ്തിട്ടുണ്ട്.
മൃഗങ്ങളെ ഉപയോഗിച്ചുള്ള ആക്രമണം, ജീവഹാനിക്കിടയാക്കുന്ന പ്രവൃത്തി തുടങ്ങിയ വകുപ്പുകള് ചേര്ത്താണ് ജിതിനെ കസ്റ്റഡിയിലെടുത്തത്. ജുവനൈല് ജസ്റ്റിസ് പ്രകാരവും കേസ് രജിസ്റ്റര് ചെയ്തിട്ടുണ്ട്.ആറുമാസം മാത്രം പ്രായമുള്ള കൈക്കുഞ്ഞിനെ കൊലകൊമ്പന് ആനയുടെ കൊമ്പിലിരുത്തിയ വീഡിയോ സമൂഹമാദ്ധ്യമങ്ങളിലടക്കം വ്യാപകമായി പ്രചരിക്കുന്നുണ്ട്. കൊമ്പില് ചേര്ത്തിരുത്തവേ തലകീഴായി മറിഞ്ഞ് ആനയുടെ കാല്ക്കീഴില് വീണ കുഞ്ഞ് തലനാരിഴയ്ക്കാണ് രക്ഷപ്പെട്ടത്.
മൂന്നുമാസം മുമ്പ് പാപ്പാനെ കുത്തിക്കൊന്ന ഹരിപ്പാട് ക്ഷേത്രത്തിലെ ആനയായ ഹരിപ്പാട് സ്കന്ദന്റെ കൊമ്പിലാണ് അഭിലാഷ് തന്റെ കുഞ്ഞിനെ ഇരുത്താന് ശ്രമിച്ചത്. വീഴ്ചയില് ആനയുടെ കാലിലെ ചങ്ങലയില് കുഞ്ഞിന്റെ തലയിടിക്കുന്നതടക്കം ദൃശ്യങ്ങളില് കാണാം.ഹരിപ്പാട് ക്ഷേത്രത്തോടു ചേര്ന്നുള്ള ദേവസ്വം ബോര്ഡിന്റെ ആനത്തറയില് കഴിഞ്ഞ ഞായറാഴ്ചയാണ് സംഭവം നടന്നത്. കുഞ്ഞിന്റെ ചോറൂണ് ചടങ്ങിനായാണ് അഭിലാഷ് ക്ഷേത്രത്തിലെത്തിയത്.
ചടങ്ങിനുശേഷം കുട്ടിയെ ആനയ്ക്കരികിലെത്തിച്ചു. കുഞ്ഞിന്റെ പേടി മാറുമെന്ന വിശ്വാസത്തില് ആനയുടെ കാലുകള്ക്കിടയിലൂടെ കൊണ്ടുപോയെന്നാണ് അഭിലാഷ് ക്ഷേത്രം ഭാരവാഹികളോട് പറഞ്ഞത്.തുടര്ന്ന് ആനക്കൊമ്പിലിരുത്തുന്നതിനിടെ കൈയില് നിന്ന് തെന്നിപ്പോയ കുഞ്ഞ് നിലത്തുവീഴുകയായിരുന്നു. നാട്ടുകാരാണ് ഇതിന്റെ ദൃശ്യങ്ങള് പകര്ത്തിയത്. സംഭവത്തെത്തുടര്ന്ന് അഭിലാഷിനെ ദേവസ്വം ബോര്ഡ് ജോലിയില് നിന്ന് പിരിച്ചുവിട്ടിരുന്നു.