ഒരു വര്‍ഷം കൊണ്ട് തമിഴ്‌നാട്ടില്‍ കെല്‍ട്രോണ്‍ നേടിയത് 1281 കോടിയുടെ ഓര്‍ഡറുകള്‍; മത്സരാധിഷ്ടിത ടെന്ററില്‍ പങ്കെടുത്താണ് നേട്ടമെന്ന് പി രാജീവ്
ഒരു വര്‍ഷം കൊണ്ട് തമിഴ്‌നാട്ടില്‍ കെല്‍ട്രോണ്‍ നേടിയത് 1281 കോടിയുടെ ഓര്‍ഡറുകള്‍
തിരുവനന്തപുരം: കഴിഞ്ഞ ഒരു വര്‍ഷം കൊണ്ട് തമിഴ്‌നാട്ടില്‍ നിന്ന് മാത്രം കെല്‍ട്രോണ്‍ നേടിയത് 1281 കോടിയുടെ ഓര്‍ഡറുകളാണെന്ന് വ്യവസായമന്ത്രി പി രാജീവ്. അതില്‍ 1000 കോടിയുടെ ഓര്‍ഡറുകള്‍ നേടിയത് മത്സരാധിഷ്ടിത ടെന്ററില്‍ പങ്കെടുത്താണെന്നത് കെല്‍ട്രോണിന്റെ മേന്മ വര്‍ധിപ്പിക്കുന്നുവെന്നും രാജീവ് വ്യക്തമാക്കി.
തമിഴ് നാട്ടിലെ 7985 സ്‌കൂളുകളില്‍ 8209 ഹൈടെക് ഐ ടി ലാബുകള്‍ സ്ഥാപിക്കുന്നതിന് 519 കോടി രൂപയുടെ ഓര്‍ഡറും തമിഴ്‌നാട്ടിലെ വിവിധ സ്‌കൂളുകളില്‍ 22931 സ്മാര്‍ട്ട് ക്ലാസ് റൂമുകള്‍ സ്ഥാപിക്കുന്നതിന് 455 കോടി രൂപയുടെ ഓര്‍ഡറും തമിഴ്‌നാട്ടിലെ പ്രൈമറി സ്‌കൂളിലെ അധ്യാപകരുടെ ഉപയോഗത്തിനായുള്ള 79723 ടാബ്ലറ്റ് കമ്പ്യൂട്ടറുകള്‍ നല്‍കുന്നതിനായി 101 കോടിയുടെ ഓര്‍ഡറും ലഭിച്ചത് കെല്‍ട്രോണ്‍ പൂര്‍ത്തീകരിച്ചുകഴിഞ്ഞു.
2024ല്‍ ഒഡീഷയില്‍ നിന്നും സ്മാര്‍ട്ട് ക്‌ളാസ്സുകള്‍ സ്ഥാപിക്കുന്നതിന് ലഭിച്ച 168 കോടി രൂപയുടെ ഓര്‍ഡറാണ് തമിഴ്‌നാട്ടിലെ 1000 കോടിയുടെ ഓര്‍ഡര്‍ നേടാന്‍ സഹായകമായത്. ഈ ഓര്‍ഡര്‍ കൃത്യമായി പൂര്‍ത്തീകരിച്ചതിനാല്‍ പുതുതായി 205 കോടി രൂപയുടെ ഓര്‍ഡര്‍ നമുക്ക് ലഭിച്ചു. ഈ കരാര്‍ പ്രകാരം 654 ഹൈടെക് ഐടി ലാബുകളും 1016 കംപ്യൂട്ടര്‍ ലാബുകളും 5732 സ്മാര്‍ട്ട് ക്ലാസ് റൂമുകളും കെല്‍ട്രോണ്‍ നിര്‍മിച്ചുനല്‍കും.
ഇതിന് പുറമെ വിവിധ സംസ്ഥാനങ്ങളിലും കെല്‍ട്രോണ്‍ നിരവധി ഓര്‍ഡറുകള്‍ നേടിയെടുത്തിട്ടുണ്ട്. പ്രതിരോധ രംഗത്തും കെല്‍ട്രോണ്‍ ഏറ്റവും വിശ്വസ്തരായ പങ്കാളികളായി തുടരുന്നു. ചരിത്രത്തിലാദ്യമായി 1000 കോടി രൂപയുടെ വിറ്റുവരവും കെല്‍ട്രോണ്‍ നേടിയെടുത്തു. ഇങ്ങനെ തന്നെ മുന്നോട്ടുപോകാം. കെല്‍ട്രോണ്‍ വീണ്ടും കേരളത്തിന്റെ അഭിമാനമായി മാറുകയാണെന്നും രാജീവ് വ്യക്തമാക്കി.