കണ്ണൂരിൽ കാർ ഓട്ടോയിൽ ഇടിച്ച് അപകടം; മദ്യലഹരിയിൽ ഡ്രൈവർ കാര്‍ നിര്‍ത്താതെ പോയി; രണ്ടുപേർക്ക് പരിക്ക്; കെഎസ്ഇബി സബ് എഞ്ചിനീയറെ കസ്റ്റഡിയിലെടുത്ത് പോലീസ്

മാതമംഗലം: മാതമംഗലം ബസാറിൽ കാർ ഓട്ടോയിൽ ഇടിച്ചുണ്ടായ അപകടത്തിൽ രണ്ടു പേർക്ക് പരിക്ക്. കെഎസ്ഇബി സബ് എഞ്ചിനീയറായ കുറ്റൂർ നെല്യാട് സ്വദേശി പ്രദീപൻ ഓടിച്ചിരുന്ന കാറാണ് ഓട്ടോയിലും ബൈക്കിലും ഇടിച്ചത്. അപകടത്തിൽ ഓട്ടോ ഡ്രൈവർ കാഞ്ഞിരങ്ങാട് സ്വദേശി രമേശൻ (48) പാണപ്പുഴ കച്ചേരിക്കടവ് ആഭി (11) എന്നിവർക്കാണ് പരിക്കേറ്റത്. കാർ ഡ്രൈവർ മദ്യലഹരിയിലായിരുന്നു എന്നാണ് നാട്ടുകാർ പറയുന്നത്.

ഇന്നലെ രാത്രി 9:20 ഓടെയാണ് അപകടമുണ്ടായത്. കാറിടിച്ചിട്ടും നിർത്താനോ പരിക്കേറ്റവരെ ആശുപത്രിയിൽ എത്തിക്കാനോ കാർ ഡ്രൈവർ തയ്യാറായില്ല. ഇയാളെ രാത്രി തന്നെ പെരിങ്ങോം പോലീസ് കസ്റ്റഡിയിലെടുത്തു. പരിക്കേറ്റ രമേശൻ പരിയാരം മെഡിക്കൽ കോളേജിലും അഭി കണ്ണൂർ മിംസ് ഹോസ്പിറ്റലിലുമായി ചികിത്സയിലാണ്.