ചുരം കയറുന്നതിനിടെ ഭാരത് ബെൻസ് ലോറിയുടെ ബ്രേക്ക് നഷ്ടമായി; തട്ടുകടകളില്‍ ഇടിച്ചു നിന്നത് കൊണ്ട് വൻ ദുരന്തം ഒഴിവായി; ഡ്രൈവര്‍ക്ക് പരിക്ക്
കോഴിക്കോട്: താമരശ്ശേരി ചുരത്തിൽ ബ്രേക്ക് നഷ്ടപ്പെട്ട ചരക്ക് ലോറി രണ്ട് തട്ടുകടകളിലേക്ക് ഇടിച്ചുകയറി. അപകടത്തിൽ ലോറി ഡ്രൈവർക്ക് പരിക്കേറ്റു. ഇന്ന് പുലർച്ചെ 1.30 ഓടെയാണ് സംഭവം നടന്നത്. മൈസൂരിൽ നിന്ന് കോട്ടയത്തേക്ക് ചരക്കുമായി പോകുകയായിരുന്ന ലോറിയാണ് അപകടത്തിൽപ്പെട്ടത്.
അപകടത്തിൽ പെരിന്തൽമണ്ണ സ്വദേശിയായ ലോറി ഡ്രൈവർ ജുറൈസിന് പരിക്കേറ്റു. അടിയന്തര വൈദ്യസഹായത്തിനായി ഇദ്ദേഹത്തെ ഈങ്ങാപ്പുഴയിലെ സ്വകാര്യ ആശുപത്രിയിൽ പ്രവേശിപ്പിച്ചു. പരിക്ക് സാരമുള്ളതല്ലെന്ന് പോലീസ് അറിയിച്ചു. ലോറിയിലുണ്ടായിരുന്ന ക്ലീനർ ദിനേഷ് പരിക്കേൽക്കാതെ രക്ഷപ്പെട്ടു.
താമരശ്ശേരി ചുരത്തിലെ 28-ാം മൈലിലാണ് അപകടം നടന്നത്. ആളൊഴിഞ്ഞ സമയത്തും കടകൾ അടച്ചിരുന്നതിനാലും വൻ ദുരന്തം ഒഴിവായി. പകൽ സമയങ്ങളിൽ ഈ ഭാഗത്ത് ധാരാളം വാഹനങ്ങളും ആളുകളും ഉണ്ടാവാറുണ്ട്. അടിവാരം സ്വദേശികളായ കാദർ, ഗഫൂർ എന്നിവരുടെ ഉടമസ്ഥതയിലുള്ള രണ്ട് തട്ടുകടകളും പൂർണമായും തകർന്നു. ഏകദേശം മൂന്ന് ലക്ഷം രൂപയുടെ നാശനഷ്ടം കണക്കാക്കുന്നു. അടിവാരം പോലീസ് ഔട്ട് പോസ്റ്റിലെ എസ്.ഐ. ശ്രീനിവാസന്റെ നേതൃത്വത്തിൽ പോലീസ് സ്ഥലത്തെത്തി തുടർ നടപടികൾ സ്വീകരിച്ചു.