തൊഴിലില്ലായ്മ നിരക്കില്‍ കേരളം രാജ്യത്ത് മൂന്നാമത്തെ സ്ഥാനത്ത്; രാജസ്ഥാനാണ് ഏറ്റവും ഉയര്‍ന്ന തൊഴിലില്ലായ്മ നിരക്കില്‍ ഉള്ള സംസ്ഥാനം; സ്ത്രീകളില്‍ തൊഴിലില്ലായ്മ നിരക്കിലും കേരളം മൂന്നാം സ്ഥാനത്ത്
ന്യൂഡല്‍ഹി: ഏപ്രില്‍-ജൂണ്‍ കാലയളവിലെ കണക്ക് പ്രകാരം തൊഴിലില്ലായ്മ നിരക്കില്‍ കേരളം രാജ്യത്ത് മൂന്നാമത്തെ സ്ഥാനത്താണ്. സംസ്ഥാനത്തിന്റെ തൊഴിലില്ലായ്മ നിരക്ക് 8.1% ആണെന്ന് കേന്ദ്ര സ്റ്റാറ്റിസ്റ്റിക്കല്‍ മന്ത്രാലയം പുറത്തുവിട്ട ത്രൈമാസ റിപ്പോര്‍ട്ടില്‍ വ്യക്തമാക്കുന്നു. രാജസ്ഥാനാണ് (8.8%) രാജ്യത്തെ ഏറ്റവും ഉയര്‍ന്ന തൊഴിലില്ലായ്മ നിരക്കുള്ള സംസ്ഥാനം. രണ്ടാം സ്ഥാനത്ത് ആന്ധ്രപ്രദേശ് (8.3%) വരികയാണ്. രാജ്യത്തിന്റെ ശരാശരി നിരക്ക് 5.4% ആണ്. സ്ത്രീകളില്‍ തൊഴിലില്ലായ്മ നിരക്കിലും കേരളം 9.5% സഹിതം മൂന്നാം സ്ഥാനത്ത് ഉണ്ട്.
ഇതുവരെ നഗരമേഖലയിലെ കണക്കുകള്‍ മാത്രമാണ് ത്രൈമാസ അടിസ്ഥാനത്തില്‍ പ്രസിദ്ധീകരിച്ചിരുന്നത്. ഗ്രാമ-നഗര മേഖലകളെ ഉള്‍പ്പെടുത്തി തയ്യാറാക്കുന്ന ആദ്യ റിപ്പോര്‍ട്ടാണ് ഇപ്പോള്‍ പുറത്തുവന്നത്. കേരളത്തിന്റെ സമീപ സംസ്ഥാനങ്ങളിലെ തൊഴില്‍ നില: തമിഴ്നാട് 5.9%, കര്‍ണാടക 2.6%, ആന്ധ്രപ്രദേശ് 8.3%. ഭാവിയില്‍ പ്രതിമാസ കണക്കിലും ഗ്രാമ-നഗര മേഖലകള്‍ ഉള്‍പ്പെടുമെങ്കിലും സംസ്ഥാനം തിരിച്ചുള്ള വിവരങ്ങള്‍ പ്രസിദ്ധീകരിക്കില്ലെന്ന് മന്ത്രാലയം അറിയിച്ചു.