ഡ്യൂട്ടിക്കിടയിൽ ഭക്ഷണം കഴിക്കാൻ ഇറങ്ങി; ബൈക്കിൽ റോഡിലൂടെ പോകുന്നതിനിടെ കാട്ടുപന്നി ആക്രമണം; നിലവിളി കേട്ട് നാട്ടുകാർ ഓടിയെത്തി; ജീവനക്കാരുടെ തലയിലും വയറിലും പരിക്ക്

തിരുവനന്തപുരം: നെയ്യാർ വന്യജീവി സങ്കേതത്തിൽ ഡ്യൂട്ടിയിലുണ്ടായിരുന്ന രണ്ട് ജീവനക്കാർക്ക് കാട്ടുപന്നിയുടെ ആക്രമണത്തിൽ പരിക്കേറ്റു. കോട്ടൂർ സെക്ഷനിലെ ബീറ്റ് ഫോറസ്റ്റ് അസിസ്റ്റൻ്റുമാരായ രാജേന്ദ്രൻ കാണി, ഷൈജു സതീശൻ എന്നിവർക്കാണ് ഇന്നലെ രാത്രി ഏഴരയോടെ ഗുരുതരമായി പരിക്കേറ്റത്.

കോട്ടൂർ ഭാഗത്ത് ഡ്യൂട്ടിയിലായിരുന്ന ഇരുവരും ഭക്ഷണം കഴിക്കാനായി സമീപത്തെത്തിയപ്പോഴാണ് സംഭവം. പെട്ടെന്ന് ഓടിയെത്തിയ കാട്ടുപന്നി ഇവർ സഞ്ചരിച്ചിരുന്ന ബൈക്കിൽ ഇടിക്കുകയായിരുന്നു. ഇടിയുടെ ആഘാതത്തിൽ ബൈക്ക് മറിഞ്ഞുവീഴുകയും ജീവനക്കാർക്ക് തലയിലും കൈകളിലും വയറിലും പരിക്കേൽക്കുകയും ചെയ്തു. ഉടൻതന്നെ ഇരുവരെയും അടുത്തുള്ള ആശുപത്രിയിൽ പ്രവേശിപ്പിച്ചു.

അപ്രതീക്ഷിതമായി ഉണ്ടായ കാട്ടുപന്നിയുടെ ആക്രമണം വന്യജീവി സങ്കേതത്തിലെ ജീവനക്കാർക്കിടയിൽ ആശങ്ക പടർത്തിയിട്ടുണ്ട്. വനത്തിൽ വന്യജീവികളുടെ സാമീപ്യം വർദ്ധിച്ചുവരുന്ന സാഹചര്യത്തിൽ ജീവനക്കാരുടെ സുരക്ഷ ഉറപ്പാക്കാൻ കൂടുതൽ മുൻകരുതലുകൾ എടുക്കണമെന്ന ആവശ്യം ഉയർന്നിട്ടുണ്ട്.