കാട്ടുപന്നി കുറുകെ ചാടി അപകടം; സ്‌കൂട്ടർ യാത്രികന് ഗുരുതര പരിക്ക്; ആശുപത്രിയിൽ പ്രവേശിപ്പിച്ചു; സംഭവം നീലേശ്വരത്ത്
നീലേശ്വരം: കാട്ടുപന്നി കുറുകെ ചാടിയതിനെത്തുടർന്നുണ്ടായ അപകടത്തിൽ സ്‌കൂട്ടർ യാത്രികന് ഗുരുതരമായി പരിക്കേറ്റു. കാഞ്ഞങ്ങാട് സ്വകാര്യ സ്ഥാപനത്തിലെ ഡ്രൈവറും വെള്ളരിക്കുണ്ട് കൂളിപ്പാറ സ്വദേശിയുമായ കുമ്പളന്താനം അമൽ സെബാസ്റ്റ്യനാണ് (27) അപകടത്തിൽപ്പെട്ടത്. വാരിയെല്ലുകൾ പൊട്ടിയ നിലയിലുള്ള ഇദ്ദേഹത്തെ കാഞ്ഞങ്ങാട്ടെ സ്വകാര്യ ആശുപത്രിയിൽ പ്രവേശിപ്പിച്ചു.
ബുധനാഴ്ച വൈകുന്നേരത്തോടെയാണ് സംഭവം. കാഞ്ഞങ്ങാടുനിന്നുള്ള ജോലികഴിഞ്ഞ് വീട്ടിലേക്ക് സ്‌കൂട്ടറിൽ മടങ്ങിവരികയായിരുന്നു അമൽ. വെള്ളരിക്കുണ്ട് സെന്റ് ജൂഡ്‌സ് കോളജിനടുത്തെത്തിയപ്പോൾ പെട്ടെന്ന് ഒരു കാട്ടുപന്നി റോഡിന് കുറുകെ ചാടുകയായിരുന്നു. ഇത് നിയന്ത്രണം വിട്ട് സ്‌കൂട്ടറിൽ ഇടിച്ചതോടെ യുവാവ് റോഡിലേക്ക് തെറിച്ചുവീണു. അപകടത്തിൽ ശരീരമാസകലം അമലിന് പരിക്കേറ്റിട്ടുണ്ട്.
പ്രദേശങ്ങളിൽ കാട്ടുപന്നികളുടെ ശല്യം വർധിച്ചു വരുന്നതിനിടെയാണ് ഈ അപകടം. വനത്തിൽനിന്നുമിറങ്ങിവരുന്ന വന്യജീവികൾ റോഡുകളിലിറങ്ങുന്നത് പതിവാണെങ്കിലും ഇതുപോലുള്ള അപകടങ്ങൾക്ക് അധികം കാരണമാകാറില്ല. ജനവാസ കേന്ദ്രങ്ങളിലേക്കും കൃഷിയിടങ്ങളിലേക്കും കാട്ടുപന്നികൾ എത്തുന്നത് പതിവായതോടെ നാട്ടുകാർ ആശങ്കയിലാണ്.