ഇരുനില വീടിന് മുകളിൽ എസി സ്ഥാപിക്കുന്നതിനിടെ കാൽ വഴുതി കിണറ്റിൽ വീണു; തിരുവനന്തപുരത്ത് 24-കാരന് ദാരുണാന്ത്യം

തിരുവനന്തപുരം: ഇരുനില വീടിന് മുകളിൽ എയർ കണ്ടീഷണർ സ്ഥാപിക്കുന്നതിനിടെ കാൽ വഴുതി കിണറ്റിൽ വീണ് യുവാവ് മരിച്ചു. പേയാട് അലക്കുന്നം ഭാഗത്താണ് സംഭവം. വിളവൂർക്കൽ പൊറ്റയിൽ സ്വദേശി അഖിൽ (24) ആണ് മരിച്ചത്. ശനിയാഴ്ച ഉച്ചയോടെയായിരുന്നു അപകടം.

മറ്റൊരു തൊഴിലാളിക്കൊപ്പമാണ് എസി സ്ഥാപിക്കാനായി അഖിൽ എത്തിയത്. ഇരുനില വീടിന്റെ മുകളിൽ ജോലി ചെയ്യുന്നതിനിടെ കാൽ വഴുതി വീടിന്റെ സൺഷെയ്ഡിൽ തട്ടി സമീപത്തെ കിണറ്റിലേക്ക് വീഴുകയായിരുന്നു. വിവരമറിഞ്ഞെത്തിയ അഗ്നിരക്ഷാസേന യൂണിറ്റ് അഖിലിനെ കിണറ്റിൽ നിന്ന് പുറത്തെടുത്തെങ്കിലും ജീവൻ രക്ഷിക്കാനായില്ല.