കാക്കനാട് വനിതാ ജയിലില്‍ ഭക്ഷണം വിളമ്പുന്നതിനെ ചൊല്ലി തര്‍ക്കം; സഹ തടവുകാരിയെ മര്‍ദിച്ച കെനിയന്‍ സ്വദേശിനിക്കെതിരേ കേസ്

കൊച്ചി: കാക്കനാട് വനിതാ ജയിലില്‍ ഭക്ഷണം വിളമ്പുന്നതിനെചൊല്ലിയുടെ തര്‍ക്കം കൈയാങ്കളിയില്‍ കലാശിച്ചു. റിമാന്‍ഡ് തടവുകാരിയെ മര്‍ദിച്ച സംഭവത്തില്‍ സഹ തടവുകാരിയായ കെനിയന്‍ സ്വദേശിനിക്കെതിരേ ഇന്‍ഫോപാര്‍ക്ക് പൊലീസ് കേസെടുത്തു.

കെനിയ സ്വദേശിനി അക്കിനി ഒന്യാങ്ങോയ്ക്കെതിരെയാണ് നടപടി. മര്‍ദനമേറ്റ തടവുകാരി നാഫിലയെ ആശുപത്രിയില്‍ പ്രവേശിപ്പിച്ചു. കഴിഞ്ഞ ദിവസം ഭക്ഷണം വിളമ്പല്‍ സംബന്ധിച്ച വാക്ക് തര്‍ക്കമാണ് ഇരുവരും തമ്മിലുള്ള സംഘര്‍ഷമായി മാറിയത്.

പരാതിയില്‍ പറയുന്നതനുസരിച്ച് അക്കിനി ഒന്യാങ്ങോ നാഫിലയെ കഴുത്തില്‍ പിടിച്ച് തള്ളുകയും തല ഭിത്തിയില്‍ ഇടിപ്പിക്കുകയും ചെയ്തു. സംഭവം ശ്രദ്ധയില്‍പ്പെട്ട ഉടന്‍ ജയില്‍ ഉദ്യോഗസ്ഥര്‍ ഇടപെട്ട് ഇരുവരെയും വേര്‍തിരിച്ച് സ്ഥിതി നിയന്ത്രണ വിധേയമാക്കി.