തോട്ടട ഗവ: ഐ.ടി.ഐയിലെ അക്രമം: കണ്ണൂരിലെ ക്യാംപസുകളില്‍ നാളെ കെ.എസ്.യു പഠിപ്പ് മുടക്ക് സമരം; സംരക്ഷണം ഒരുക്കുമെന്ന് കെ. സുധാകരന്‍
കണ്ണൂരിലെ ക്യാംപസുകളില്‍ നാളെ കെ.എസ്.യു പഠിപ്പ് മുടക്ക്
കണ്ണൂര്‍ : തോട്ടട ഗവ. ഐ.ടി.ഐ കോളേജില്‍ നശിപ്പിച്ച കൊടിമരം വീണ്ടും സ്ഥാപിക്കാന്‍ ശ്രമിച്ച കെ.എസ്.യു പ്രവര്‍ത്തകരെ എസ്.എഫ്.ഐ ആക്രമിച്ചതില്‍ പ്രതിഷേധിച്ച് ഡിസംബര്‍ 12 ന് ജില്ലയിലെ പ്രൊഫഷനല്‍ കോളേജ് ഉള്‍പ്പെടെയുള്ള മുഴുവന്‍ ക്യാംപസിലും പഠിപ്പു മുടക്കി പ്രതിഷേധിക്കാന്‍ കെ.എസ്.യു ജില്ലാ കമ്മിറ്റി ആഹ്വാനം ചെയ്തു.
കണ്ണൂര്‍ ഐ.ടി.ഐ മറ്റൊരു യൂനിവേഴ്‌സിറ്റി കാംപസായി മാറിയിരിക്കുകയാണെന്ന് കെ.എസ്.യു ജില്ലാ പ്രസിഡന്റ് എം.സി അതുല്‍ആരോപിച്ചു. കെ.എസ്.യു ഗുണ്ടകളെ റിക്രൂട്ട്‌മെന്റ് ചെയ്യുന്ന കേന്ദ്രമായി ഗവ. ഐ.ടി.ഐ മാറി കഴിഞ്ഞു. ജനാധിപത്യം നിലനിര്‍ത്താനുള്ള പോരാട്ടത്തിന്റെ ഭാഗമായി ഏതറ്റവും പോകുമെന്ന് എം.സി അതുല്‍ പറഞ്ഞു.
കഴിഞ്ഞ ദിവസം സ്ഥാപിച്ച കെ.എസ്.യു കൊടിമരം എസ്.എഫ്.ഐ പ്രവര്‍ത്തകര്‍ പിഴുതെറിഞ്ഞിരുന്നു. ഇതു സ്ഥാപിക്കാനായി ബുധനാഴ്ച്ച രാവിലെ ക്യാംപസിലെത്തിയ ഐ.ടി.ഐ യൂനിറ്റ് പ്രസിഡന്റ് മുഹമ്മദ് റിബിന്‍, കെ.എസ്.യു സംസ്ഥാന ജനറല്‍ സെക്രട്ടറി ഫര്‍ഹാന്‍ മുണ്ടേരി, രാഗേഷ ബാലന്‍, ഹരികൃഷ്ണന്‍ പാളാട്, അര്‍ജുന്‍ കോറോം,ബിതുല്‍ ബാലന്‍' ദേവകുമാര്‍ എന്നിവര്‍ക്കാണ് മര്‍ദ്ദനമേറ്റത്.
ഇവരെ ചാലയിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഐ.ടി.ഐ പ്രിന്‍സിപ്പലിനെ കൊടിമരം സ്ഥാപിക്കുന്ന വിഷയം സംസാരിക്കുന്നതിനായി കാണാന്‍ പോയ കെ.എസ്.യു ജില്ലാ പ്രസിഡന്റ് എം.സി അതുലിനെ തടഞ്ഞ് കൈയ്യേറ്റത്തിന് ശ്രമിച്ചതായും പരാതിയുണ്ട്. സംഭവത്തില്‍ ഇരുവിഭാഗം വിദ്യാര്‍ത്ഥികള്‍ക്കെതിരെ എടക്കാട് പൊലിസ് കേസെടുത്തിട്ടുണ്ട്.
തോട്ടട ഐടിഐയില്‍ കെ.എസ്.യു പ്രവര്‍ത്തകരെ ക്രൂരമായി മര്‍ദ്ദിച്ച എസ്എഫ് ഐ നടപടി കിരാതമാണെന്നും അക്രമം നടത്തിയ ക്രിമിനല്‍ കുട്ടി സഖാക്കള്‍ക്കെതിരെ കര്‍ശന നിയമ നടപടി സ്വീകരിക്കണമെന്നും കെപിസിസി പ്രസിഡന്റ് കെ.സുധാകരന്‍ എംപി മുന്നറിയിപ്പ് നല്‍കി.
ജനാധിപത്യ സംവിധാനത്തില്‍ അനുവദിച്ചിട്ടുള്ള സ്വതന്ത്രമായ സംഘടനാ പ്രവര്‍ത്തനം തടസ്സപ്പെടുത്തുന്ന കമ്യൂണിസറ്റ് ഫാസിസത്തിന്റെ തുടര്‍ച്ചയാണീ അക്രമം. ഇത് അംഗീകരിക്കാനാവില്ല.
തിരുവനന്തപുരം യൂണിവേഴ്സിറ്റി കോളേജിന് സമാനമായി എസ്എഫ് യുടെ ഇടിമുറി സംസ്‌കാരം കഴിഞ്ഞ ദിവസം ഇവിടെയും അരങ്ങേറി.ഒരു വിദ്യാര്‍ത്ഥിയെ ക്രൂരമായിട്ടാണ് മര്‍ദ്ദിച്ചത്.ഇതിനു പുറമെയാണ് കെഎസ്.യു പ്രവര്‍ത്തകര്‍ ക്യാമ്പസിനുള്ള സ്ഥാപിച്ച കൊടിമരം എസ്എഫ് ഐക്കാര്‍ തകര്‍ത്തത്. മൂന്നര പതിറ്റാണ്ടിന് ശേഷം എതാനും മാസങ്ങള്‍ക്ക് മുന്‍പാണ് ഇവിടെ കെഎസ്.യു യൂണിറ്റ് സ്ഥാപിച്ചത്. യൂണിയന്‍ തിരഞ്ഞെടുപ്പ് പ്രഖ്യാപിച്ചത് മുതല്‍ മനഃപൂര്‍വ്വം പ്രശ്നങ്ങള്‍ സൃഷ്ടിക്കാന്‍ എസ്.എഫ്.ഐ ശ്രമിക്കുകയാണ്. അക്രമികള്‍ക്ക് സഹായം ചെയ്യുന്ന നിലപാടാണ് പോലീസ് സ്വീകരിക്കുന്നത്. പക്ഷപാതപരമായിട്ടാണ് പോലീസ് പെരുമാറിയത്. ഐടി ഐയിലെ അധ്യാപകരും ഈ ക്രൂരതയ്ക്ക് കൂട്ടുനില്‍ക്കുകയാണ്.
വളര്‍ന്നു വരുന്ന തലമുറയില്‍ രാഷ്ട്രീയ നേതൃപാടവം വളര്‍ത്തുന്നതിന് പകരം അക്രമവാസനയെ പ്രോത്സാഹിക്കിപ്പിക്കുകയാണ് സിപിഎം നേതൃത്വം. കെഎസ് യു യൂണിറ്റ് പ്രസിഡന്റ് മുഹമ്മദ് റിബിന്‍ സി എച്ചിനെ എസ്എഫ് ഐക്കാര്‍ ഐടി ഐ ക്യാമ്പസിനുള്ളില്‍ ക്രൂരമായി മര്‍ദ്ദിച്ചു.കെഎസ് യു സംസ്ഥാന സെക്രട്ടറി ഫര്‍ഹാന്‍ മുണ്ടേരി, അര്‍ജുന്‍ കോറാം, രാഗേഷ് ബാലന്‍,ഹരികൃഷ്ണന്‍ പാളാട് ഉള്‍പ്പെടെയുള്ള വിദ്യാര്‍ത്ഥികള്‍ക്കാണ് മര്‍ദ്ദനത്തില്‍ പരിക്കേറ്റത്. കൈയ്യൂക്കിന്റെ ബലത്തില്‍ കായികമായി നേരിട്ട് നിശബ്ദമാക്കാമെന്ന ധാര്‍ഷ്ട്യം സിപിഎമ്മും എസ്എഫ് ഐയും ഉപേക്ഷിക്കുന്നതാണ് ഉചിതം. അക്രമം കോണ്‍ഗ്രസ് ശൈലിയല്ല. ഗത്യന്തരമില്ലാതെ പ്രതിരോധത്തിന്റെ മാര്‍ഗം കുട്ടികള്‍ സ്വീകരിച്ചാല്‍ അവര്‍ക്ക് സംരക്ഷണം ഒരുക്കി കെപിസിസി രംഗത്തുണ്ടാകുമെന്നും കെ.സുധാകരന്‍ പറഞ്ഞു.