വാഹനാപകടത്തിൽ ഓർമ്മയും പോയി, കാലുകളും തളർന്നു; വിധി തോൽപ്പിച്ചിടത്ത് വിസ്മയമായി ആതിര സുഗതൻ; വീൽചെയറിലിരുന്ന് ഐഎഎസ് പടവുകൾ കയറി കോഴിക്കോട്ടുകാരി; ഡോക്ടറിൽ നിന്ന് കലക്ടറേറ്റിലേക്ക് ആതിര സുഗതൻ നടന്നു കയറിയത് അതിജീവനത്തിന്റെ കനൽവഴികൾ പിന്നിട്ട്; തോറ്റുകൊടുക്കാൻ മനസ്സില്ലാത്തവർക്ക് ഈ പെൺകുട്ടി ഒരു പാഠപുസ്തകം

കോഴിക്കോട്: വിധി തോൽപ്പിക്കാൻ ശ്രമിച്ചിടത്തുനിന്ന് നിശ്ചയദാർഢ്യം കൊണ്ട് വിജയഗാഥ രചിച്ചിരിക്കുകയാണ് ഡോ. ആതിര സുഗതൻ. ഓർമകളും ചലനശേഷിയും കവർന്നെടുത്ത വാഹനാപകടത്തിന്റെ ആഘാതങ്ങളെ അതിജീവിച്ച്, സിവിൽ സർവീസ് പരീക്ഷയിൽ 483-ാം റാങ്ക് നേടിയാണ് ഈ കോഴിക്കോട്ടുകാരി തന്റെ സ്വപ്നം സാക്ഷാത്കരിച്ചത്. പരിമിതികളെ പരിഭവിച്ചല്ല, പരിശ്രമം കൊണ്ട് മറികടക്കുകയാണ് വേണ്ടതെന്ന് സ്വന്തം ജീവിതം കൊണ്ട് തെളിയിക്കുകയാണ് ഈ മിടുക്കി.

നാല് വർഷത്തെ നീണ്ട കാത്തിരിപ്പിനും കഠിനാധ്വാനത്തിനുമൊടുവിൽ നാലാം ശ്രമത്തിലാണ് ആതിര സിവിൽ സർവീസ് എന്ന ലക്ഷ്യത്തിലെത്തിയത്. മലയാളം ഓപ്ഷണൽ ആയി തിരഞ്ഞെടുത്ത ആതിര, മലയാളത്തിലാണ് അഭിമുഖത്തെയും നേരിട്ടത്. മൂന്ന് തവണ പരാജയപ്പെട്ടപ്പോഴും തളരാതെ മുന്നേറിയതാണ് ആതിരയെ ഈ നേട്ടത്തിന് അർഹയാക്കിയത്.

ബി.ഡി.എസ്. ബിരുദധാരിയായ ആതിരയുടെ ജീവിതത്തിൽ വലിയ മാറ്റമുണ്ടാക്കിയത് കോവിഡ് കാലത്തെ സന്നദ്ധസേവനമാണ്. ഭിന്നശേഷിക്കാർക്കായി നടത്തിയ പ്രവർത്തനങ്ങളിൽ വോളന്റിയറായി സേവനം ചെയ്തതും 'ചിത്രശലഭം' എന്ന പ്രോജക്റ്റിൽ പങ്കാളിയായതുമാണ് ആതിരയെ സിവിൽ സർവീസ് എന്ന വലിയ ലക്ഷ്യത്തിലേക്ക് നയിച്ചത്. വെറുമൊരു കരിയർ എന്നതിലുപരി ഒരു സേവന മേഖലയായാണ് ആതിര സിവിൽ സർവീസിനെ കാണുന്നത്.

പകൽ വെളിച്ചവും രാത്രിയുടെ നിശബ്ദതയും ആതിരയ്ക്ക് പഠനത്തിനുള്ള സമയമായിരുന്നു. ദിവസവും നാല് മണിക്കൂർ മാത്രമാണ് ആതിര ഉറങ്ങിയിരുന്നത്. ബാക്കി സമയം മുഴുവൻ ഏകാഗ്രമായ പഠനത്തിനായി നീക്കിവെച്ചു. "പഠനമല്ലാതെ മറ്റൊന്നിനെക്കുറിച്ചും ചിന്തിച്ചില്ല. വിട്ടുവീഴ്ചയില്ലാത്ത പരിശ്രമം മാത്രമായിരുന്നു കൈമുതൽ"- ആതിരയുടെ വാക്കുകളിൽ ആത്മവിശ്വാസം നിഴലിക്കുന്നു.

ഭിന്നശേഷിക്കാരായ വിദ്യാർത്ഥികളെ സമൂഹത്തിന്റെ മുൻനിരയിൽ എത്തിക്കുക എന്ന ലക്ഷ്യത്തോടെ ഡോ. ജോബിൻ എസ്. കൊട്ടാരം ആവിഷ്കരിച്ച 'പ്രൊജക്റ്റ്‌ ചിത്രശലഭം' എന്ന പദ്ധതിയാണ് ആതിരയുടെ വിജയത്തിൽ നിർണ്ണായകമായത്. അഞ്ച് വർഷങ്ങൾക്ക് മുൻപ് ഭിന്നശേഷിക്കാർക്കും സിവിൽ സർവീസ് എഴുതാം എന്ന ഡോ. ജോബിന്റെ വീഡിയോ കണ്ടതാണ് ആതിരയുടെ ജീവിതത്തിലെ വഴിത്തിരിവ്. ഭിന്നശേഷിക്കാർക്കായി പ്രത്യേക പദ്ധതികൾ ഇല്ലാതിരുന്ന കാലത്ത് ആതിരയെ ആദ്യ വിദ്യാർത്ഥിയായി ചേർത്താണ് ഡോ. ജോബിൻ ഈ പദ്ധതിക്ക് തുടക്കം കുറിച്ചത്.

മുൻ ഐ.എ.എസ്. ഉദ്യോഗസ്ഥൻ റോയ് പോൾ, മുൻ ഡി.ജി.പി. ഋഷിരാജ് സിംഗ്, ഡോ. എം.സി. ദിലീപ് കുമാർ തുടങ്ങിയ പ്രഗത്ഭരുടെ കീഴിൽ ലഭിച്ച ഇന്റർവ്യൂ പരിശീലനം ആതിരയ്ക്ക് വലിയ മുതൽക്കൂട്ടായി. ഷെറിൻ ഷഹാനയെയും എ.കെ. ശാരികയെയും പോലുള്ള പ്രതിഭകൾക്ക് പിന്നാലെ ഇപ്പോൾ ആതിരയും സിവിൽ സർവീസിന്റെ പടവുകൾ കയറുകയാണ്. വാഹനാപകടത്തിൽ അരയ്ക്ക് താഴെ ചലനശേഷിയും ഓർമശക്തിയും നഷ്ടപ്പെട്ട ഇരുളടഞ്ഞ നാളുകളിൽ നിന്ന്, ഇന്ത്യയുടെ ഭരണസിരാകേന്ദ്രങ്ങളിലേക്ക് പടർന്നുകയറുന്ന ആതിര സുഗതൻ വരുംതലമുറയിലെ ഉദ്യോഗാർത്ഥികൾക്ക് വലിയൊരു പാഠപുസ്തകമാണ്.