ചുമ്മാ...ഇൻബോക്സ് നോക്കിയപ്പോൾ ദേ..കിടക്കുന്നു അണ്ണന്റെ എഐ മെസ്സേജ്..!!; 'പ്രണയക്കാലം' സ്റ്റാർ അജ്മൽ തന്നോടും മോശം രീതിയിൽ ഇടപ്പെട്ടുവെന്ന് വെളിപ്പെടുത്തി നടി റോഷ്ന; ‘ഹൗ ആർ യു’..‘നീ അവിടെ ഉണ്ടോ’ എന്നൊക്കെ മെസ്സേജ് ചെയ്ത് ശല്യം; ചിരിക്കുന്ന ഇമോജി അയച്ച് മറുപടി; സന്ദേശങ്ങളുടെ സ്ക്രീൻഷോട്ട് സഹിതം പങ്കിട്ട് പോസ്റ്റ്

കൊച്ചി: നടൻ അജ്മൽ അമീറിനെതിരെ ഉയർന്നുവന്ന ലൈംഗികാരോപണ വിവാദത്തിൽ നിർണ്ണായകമായ പുതിയ തെളിവുകളുമായി ഡിസൈനറും മേക്കപ്പ് ആർട്ടിസ്റ്റുമായ റോഷ്‌ന ആൻ റോയ് രംഗത്തെത്തി. അജ്മൽ അയച്ചുവെന്ന് പറയപ്പെടുന്ന ഇൻസ്റ്റഗ്രാം സന്ദേശങ്ങളുടെ സ്ക്രീൻഷോട്ടുകൾ പുറത്തുവിട്ടുകൊണ്ടാണ് റോഷ്‌ന പുതിയ വെളിപ്പെടുത്തലുകൾ നടത്തിയിരിക്കുന്നത്.

പ്രചരിക്കുന്ന സന്ദേശങ്ങൾ നിർമ്മിത ബുദ്ധി (AI) ഉപയോഗിച്ച് തയ്യാറാക്കിയതാണെന്നും അക്കൗണ്ട് കൈകാര്യം ചെയ്തിരുന്നവർ അയച്ചതാണെന്നും നടൻ വിശദീകരിച്ചിരുന്നു. ഈ സാഹചര്യത്തിലാണ് താരത്തിന്റെ വിശദീകരണ വീഡിയോയോടൊപ്പം റോഷ്‌ന ഈ സന്ദേശങ്ങളുടെ സ്ക്രീൻഷോട്ടുകൾ പങ്കുവെച്ചത്.

"എത്ര നല്ല വെള്ളപൂശൽ. ചുമ്മാ ഇൻബോക്സ് നോക്കിയപ്പോൾ ദേ കിടക്കുന്നു അണ്ണന്റെ എഐ മെസ്സേജ്," എന്നായിരുന്നു റോഷ്‌ന ആൻ റോയ് സ്ക്രീൻഷോട്ടിനൊപ്പം കുറിച്ചത്. സ്ക്രീൻഷോട്ടിൽ 'ഹൗ ആർ യു', 'നീ അവിടെ ഉണ്ടോ' തുടങ്ങിയ സന്ദേശങ്ങൾ കാണാം. നടൻ അവകാശപ്പെടുന്നതുപോലെ ഈ സന്ദേശങ്ങളും എഐയുടെ ഭാഗമാണോ എന്ന സംശയമാണ് റോഷ്‌ന ഇവിടെ ഉയർത്തുന്നത്.

നേരത്തെ, തന്റേതെന്ന പേരിൽ പ്രചരിച്ച വിഡിയോ കോൾ ദൃശ്യങ്ങളും ശബ്ദസന്ദേശങ്ങളും എഐ ഉപയോഗിച്ച് നിർമ്മിച്ചതാണെന്ന് വിശദീകരിച്ചുകൊണ്ട് അജ്മൽ അമീർ ഒരു വീഡിയോ പുറത്തിറക്കിയിരുന്നു. ഈ വീഡിയോ പുറത്തിറങ്ങിയതിന് പിന്നാലെ, അതിന്റെ കമന്റ് ബോക്സിൽ നിരവധി യുവതികളാണ് നടനെതിരെ കൂടുതൽ വെളിപ്പെടുത്തലുകളുമായി രംഗത്തെത്തിയത്. തനിക്ക് അജ്മൽ അമീറിൽ നിന്ന് ദുരനുഭവം നേരിട്ടതായും, വിഡിയോ കോളുകൾ ചെയ്തതായും മോശം സന്ദേശങ്ങൾ അയച്ചതായും നിരവധിപേർ കമന്റുകളിൽ ആരോപിച്ചിരുന്നു. സിനിമയിൽ തനിക്കൊപ്പം അഭിനയിച്ച സഹതാരങ്ങളോടും അജ്മൽ മോശമായി പെരുമാറിയതായി ചിലർ ആരോപണം ഉന്നയിച്ചിട്ടുണ്ട്.

എന്നാൽ, ഈ ആരോപണങ്ങളെല്ലാം താരം നിഷേധിച്ചിരുന്നു. പുറത്തുവന്ന സന്ദേശങ്ങളും ശബ്ദങ്ങളും വ്യാജമായി സൃഷ്ടിച്ചതാണെന്നും, അവ തന്റെ അക്കൗണ്ട് കൈകാര്യം ചെയ്തിരുന്നവരാണ് അയച്ചതെന്നും അദ്ദേഹം പറഞ്ഞിരുന്നു. ഇനിയങ്ങോട്ട് തന്റെ സോഷ്യൽ മീഡിയ അക്കൗണ്ടുകൾ താൻ മാത്രമേ ഉപയോഗിക്കുകയുള്ളൂ എന്നും അജ്മൽ അറിയിച്ചിരുന്നു. ഇതിന് മുന്നോടിയായി അദ്ദേഹം ഇൻസ്റ്റഗ്രാമിൽ ഒരു സ്റ്റോറിയും പങ്കുവെച്ചിരുന്നു.

എന്നാൽ, ഈ വിശദീകരണങ്ങളെ വിശ്വസിക്കില്ലെന്നും, ഭാര്യയോടൊപ്പം ഇക്കാര്യം വന്നുപറയാൻ ധൈര്യമുണ്ടോ എന്നും ചോദിച്ച് ചിലർ രംഗത്തെത്തിയിരുന്നു. ഇതിനു പിന്നാലെയാണ് ഇപ്പോൾ നടി റോഷ്‌ന ആൻ റോയ് പുതിയ വെളിപ്പെടുത്തലുമായി രംഗപ്രവേശം ചെയ്തിരിക്കുന്നത്.

ഈ സംഭവങ്ങൾ വലിയ ചർച്ചകൾക്ക് വഴിവെച്ചിരിക്കുകയാണ്. നടൻ്റെ വിശദീകരണങ്ങൾക്കിടയിലും ഉയർന്നുവരുന്ന ആരോപണങ്ങൾ കൂടുതൽ വ്യക്തതയോടെ അന്വേഷണങ്ങൾക്ക് വിധേയമാകേണ്ടതുണ്ട്. റോഷ്‌ന ആൻ റോയ് പുറത്തുവിട്ട സ്ക്രീൻഷോട്ടുകൾ വീണ്ടും പുതിയ വിവാദത്തിന് തിരികൊളുത്തിയിരിക്കുകയാണ്.