'ഇരയായ പെണ്‍കുട്ടിയുടെ പേര് രാഹുല്‍ ചേട്ടന്‍ വെളിപ്പെടുത്തിയിട്ടില്ല, അത് കളവാണ്; പരാതിക്കാര്‍ക്ക് എതിരെയല്ല, പുരുഷന്‍മാര്‍ക്ക് വേണ്ടിയാണ് രാഹുല്‍ ഈശ്വര്‍ പ്രതികരിച്ചത്; ജാമ്യമുള്ള വകുപ്പുകളാണ് ചുമത്തിയതെന്നാണ് ഉദ്യോഗസ്ഥര്‍ അറിയിച്ചത്'; രാഹുല്‍ ഈശ്വറിനെ കസ്റ്റഡിയില്‍ എടുത്തതില്‍ പ്രതികരിച്ചു ദീപ രാഹുല്‍
'ഇരയായ പെണ്‍കുട്ടിയുടെ പേര് രാഹുല്‍ ചേട്ടന്‍ വെളിപ്പെടുത്തിയിട്ടില്ല,
തിരുവനന്തപുരം: രാഹുല്‍ മാങ്കൂട്ടത്തിലിനെതിരായ ലൈംഗിക പീഡനക്കേസില്‍ അതിജീവിതയെ അപമാനിച്ചുവെന്ന പരാതിയില്‍ രാഹുല്‍ ഈശ്വറിനെ കസ്റ്റഡിയലെടുത്ത സംഭവത്തില്‍ പ്രതികരിച്ചു ഭാര്യ ദീപ രാഹുല്‍ ഈശ്വര്‍. ഇരയായ പെണ്‍കുട്ടിയുടെ പേര് വെളിപ്പെടുത്തിയെന്ന് പറഞ്ഞാണ് ഉദ്യോഗസ്ഥര്‍ എത്തിയതെന്ന് ദീപ പറഞ്ഞു. എന്നാല്‍, പെണ്‍കുട്ടിയുടെ പേര് രാഹുല്‍ ചേട്ടന്‍ വെളിപ്പെടുത്തിയിട്ടില്ല, അത് കളവാണെന്ന് ദീപ മാധ്യമങ്ങളോട് പറഞ്ഞു.
ഒരു ഘട്ടത്തിലും പെണ്‍കുട്ടിയുടെ ചിത്രമോ പേരോ വെളിപ്പെടുത്തിയിട്ടില്ല. അത് പബ്ലിക് പ്ലാറ്റ്‌ഫോമിലുള്ള കാര്യമാണ്. രാഹുല്‍ ഈശ്വര്‍ പരാതിക്കാരിക്ക് എതിരെയല്ല പ്രതികരിച്ചത്. പുരുഷന്‍മാര്‍ക്ക് വേണ്ടിയാണ് പ്രതികരിച്ചത്. ആ കുട്ടിയ പറയുന്നത് പലതും കളവാണ്. കളവ് പറഞ്ഞ് ശ്രദ്ധ നേടേണ്ട ആവശ്യമില്ലല്ലോ, അതെക്കുറിച്ചാണ് രാഹുല്‍ പ്രതികരിച്ചത്. പുരുഷന്‍മാര്‍ക്ക് വേണ്ടിയാണ് രാഹുല്‍ ഈശ്വര്‍ സംസാരിച്ചത്. അവര്‍ക്ക് വേണ്ടി സംസാരിക്കാനും ആരെങ്കിലും വേണ്ടെയെന്നും ദീപ രാഹുല്‍ ചോദിച്ചു.
ഇന്ന് വൈകുന്നേരം അഞ്ച് മണിയോടെ തിരുവനന്തപുരത്തെ വീട്ടില്‍ നിന്നാണ് സൈബര്‍ പൊലീസ് രാഹുലിനെ കസ്റ്റഡിയിലെടുത്തത്. രാഹുല്‍ ഈശ്വറിനെ തിരുവനന്തപുരത്തെ തൈക്കാട്ടെ എആര്‍ ക്യാമ്പിലേക്ക് എത്തിച്ചു. ഐടി ആക്ട് -43, 66, ബിഎന്‍എസ്- 72, 79, 351 (1), 351 (2) തുടങ്ങിയ വകുപ്പുകള്‍ ചുമത്തിയാണ് കേസ്.
രാഹുല്‍ മാങ്കൂട്ടത്തിലിനെതിരെ പരാതി നല്‍കിയ അതിജീവിതക്കെതിരെ നിരന്തരമായി ആരോപണങ്ങളുന്നയിക്കുകയും സമൂഹമാധ്യമങ്ങളിലൂടെ ആക്ഷേപിക്കുകയും ചെയ്തുവെന്ന പരാതിയിലാണ് കസ്റ്റഡിയിലെടുത്തത്. രാഹുലിന്റെ ലാപ്ടോപ്പുകള്‍, മൊബൈല്‍ ഫോണ്‍ തുടങ്ങിയവയും പരിശോധനയ്ക്കായി പൊലീസ് കസ്റ്റഡിയിലെടുത്തിട്ടുണ്ട്.
ലൈംഗിക പീഡനക്കേസില്‍ ഒളിവില്‍ കഴിയുന്ന രാഹുല്‍ മാങ്കൂട്ടത്തിലിനെ ന്യായീകരിച്ചുകൊണ്ട് കഴിഞ്ഞ ദിവസങ്ങളിലായി രാഹുല്‍ ഈശ്വര്‍ സമൂഹമാധ്യമങ്ങളില്‍ പങ്കുവെച്ച പോസ്റ്റുകള്‍, വീഡിയോ ദൃശ്യങ്ങള്‍ എന്നിവയും അതിജീവിതയെ ആക്ഷേപിക്കുകയും ചെയ്യുന്ന തെളിവുകള്‍ സഹിതമാണ് യുവതി പരാതി നല്‍കിയിരിക്കുന്നത്. പെണ്‍കുട്ടി നല്‍കിയ തെളിവുകളും വിശദമായ പരിശോധിച്ചതിന് ശേഷം പരാതിയില്‍ കഴമ്പുണ്ടെന്ന് ബോധ്യത്തിലാണ് പൊലീസ് രാഹുലിനെ കസ്റ്റഡിയിലെടുത്തിരിക്കുന്നത്.
കസ്റ്റഡിയിലെടുത്ത് അല്‍പസമയങ്ങള്‍ക്ക് മുമ്പാണ് രാഹുലിനെ തിരുവനന്തപുരത്തെ എ.ആര്‍ ക്യാമ്പില്‍ എത്തിച്ചത്. സൈബര്‍ എസിപിയുടെ നേതൃത്വത്തിലായിരിക്കും ചോദ്യംചെയ്യുകയാണ്. അറസ്റ്റു ചെയ്‌തേക്കുമെന്നാണ് സൂചനകള്‍.