ഇത് ഇങ്ങനെ ഒന്നും അല്ലടാ..നമുക്ക് ഇന്ന് പോണ്ടേ..!!; താഴെ നിന്ന് നോക്കിയാൽ റോഡ് വന്ന് വീട്ടിലേക്ക് ഇടിച്ചുകയറിയതു പോലെ തോന്നും; ജസ്റ്റ് ഒന്ന് മുട്ടിയാൽ തീർന്നു; യാത്രക്കാരുടെ കിളി പോയ അവസ്ഥ; ദേശീയ പാത കടന്നുപോകുന്നത് വീടിന്‍റെ ബാൽക്കണിയിലൂടെ; തലയിൽ കൈവച്ച് വീട്ടുകാർ; ദൃശ്യങ്ങൾ പുറത്ത്
നാഗ്പൂർ: നിർമ്മാണത്തിലിരിക്കുന്ന ഒരു ദേശീയ പാതയുടെ മേൽപ്പാലം റെസിഡൻഷ്യൽ കെട്ടിടത്തിന്‍റെ ബാൽക്കണിയുടെ മധ്യത്തിലൂടെ കടന്നുപോകുന്നതിന്‍റെ വീഡിയോ സോഷ്യൽ മീഡിയയിൽ വൈറലായി. നഗരത്തിലെ നഗരാസൂത്രണത്തെയും അടിസ്ഥാന സൗകര്യ വികസനത്തെയും കുറിച്ച് ഗൗരവമായ ചോദ്യങ്ങൾ ഉയർത്തിയിരിക്കുകയാണ് ഈ സംഭവം. നാഷണൽ ഹൈവേ അതോറിറ്റി ഓഫ് ഇന്ത്യ (NHAI) വികസിപ്പിക്കുന്ന ഇൻഡോർ-ദിഘോരി ഇടനാഴിയുടെ ഭാഗമായ അശോക് നഗറിലെ മേൽപ്പാലമാണ് ചർച്ചാവിഷയമായിരിക്കുന്നത്.
മേൽപ്പാലം നിർമ്മിച്ചിരിക്കുന്നത് അനധികൃതമായി കൈയേറ്റം ചെയ്ത സ്ഥലത്താണെന്ന് NHAI ഉദ്യോഗസ്ഥർ അവകാശപ്പെട്ടു. "മേൽപ്പാലം ബാൽക്കണിയുടെ പുറത്തുകൂടിയല്ല കടന്നുപോകുന്നത്. യഥാർത്ഥത്തിൽ, ബാൽക്കണി കൈയേറ്റം ചെയ്ത സ്ഥലത്താണ് നിർമ്മിച്ചിരിക്കുന്നത്. ഈ അനധികൃത കൈയേറ്റം നീക്കം ചെയ്യാൻ നാഗ്പൂർ മുനിസിപ്പൽ കോർപ്പറേഷന് (NMC) കത്ത് നൽകിയിട്ടുണ്ട്," ഒരു NHAI ഉദ്യോഗസ്ഥൻ പിടിഐയോട് പറഞ്ഞു. കൈയേറ്റം ഉടൻ നീക്കം ചെയ്യുമെന്നും അദ്ദേഹം കൂട്ടിച്ചേർത്തു.
എന്നാൽ, കെട്ടിടത്തിന്‍റെ ഉടമസ്ഥൻ ഈ വാദങ്ങളെ നിഷേധിച്ചു. മേൽപ്പാലം ബാൽക്കണിയുടെ ഒരു ഭാഗത്തിലൂടെ കടന്നുപോകുന്നുണ്ടെങ്കിലും, കെട്ടിടത്തിന്‍റെ പ്രധാന ഭാഗങ്ങളെ സ്പർശിക്കുന്നില്ലെന്ന് അദ്ദേഹം വ്യക്തമാക്കി. "ഫ്ലൈഓവർ ഉപയോഗശൂന്യമായ ഒരു ഭാഗത്തിലൂടെയാണ് കടന്നുപോകുന്നത്. മേൽപ്പാലം ഏകദേശം 14-15 അടി ഉയരത്തിലാണ് സ്ഥിതി ചെയ്യുന്നത്. അതിനാൽ, യാതൊരു സുരക്ഷാ പ്രശ്നങ്ങളുമില്ല," വീട്ടുടമസ്ഥൻ പറഞ്ഞു.
ഈ സംഭവത്തിന്‍റെ വീഡിയോ വ്യാപകമായി പ്രചരിച്ചതോടെ, നിർമ്മാണ നിലവാരത്തെയും താമസക്കാരുടെ സുരക്ഷയെയും കുറിച്ചുള്ള ആശങ്കകൾ വർദ്ധിച്ചു. ഇത് കൂടാതെ, ഈ കെട്ടിടം ഭൂവുടമയ്ക്ക് പാട്ടത്തിന് നൽകിയതാണെന്ന് ഒരു മുതിർന്ന എൻഎംസി ഉദ്യോഗസ്ഥൻ സ്ഥിരീകരിച്ചു. നിലവിൽ, പാട്ടക്കരാറിന്‍റെ നിബന്ധനകൾ മുനിസിപ്പൽ അധികൃതർ വിശദമായി പരിശോധിച്ചുവരികയാണ്. പാട്ടക്കരാർ പരിശോധനയ്ക്ക് ശേഷം, ആവശ്യമായ നടപടിക്രമങ്ങൾ പാലിച്ച് കെട്ടിടം ഒഴിപ്പിക്കാൻ നടപടി സ്വീകരിക്കുമെന്നും ഉദ്യോഗസ്ഥൻ അറിയിച്ചു.