വീട്ടിലെ കഷ്ടപ്പാടുകൾ കാരണം നേരെത്തെ കെട്ടിച്ചയച്ച ജീവിതം; ഭർത്താവ് മദ്യത്തിന് അടിമ എന്ന തിരിച്ചറിവ് ഉണ്ടായതോടെ മുഴുവൻ പ്രശ്‌നം; അത്രയും 'ടോക്സിക്' ആയ ആ ബന്ധം ഉപേക്ഷിച്ചതും തലവര തന്നെ മാറി; ഒടുവിൽ അധ്യാപികയിൽ തുടങ്ങി അവളുടെ സ്വപ്നത്തിലേക്ക്; ഇത് പ്രതിസന്ധികളെ തരണം ചെയ്ത പോലീസ് 'അഞ്ജു'വിന്റെ കഥ
പ്രതികൂല സാഹചര്യങ്ങളോട് പോരാടി ജീവിതത്തിൽ വിജയം കൈവരിച്ചവരുടെ കഥകൾ എന്നും പ്രചോദനമാണ്. എന്നാൽ സ്ത്രീകൾക്ക്, പ്രത്യേകിച്ച് സമൂഹം ഒറ്റപ്പെടുത്താൻ ശ്രമിക്കുന്ന സാഹചര്യങ്ങളിൽ, വിജയത്തിലേക്കുള്ള യാത്ര അത്ര എളുപ്പമായിരിക്കില്ല. അത്തരത്തിൽ, തൻ്റെ ജീവിതാനുഭവം പങ്കുവെച്ചുകൊണ്ട് നിരവധി സ്ത്രീകൾക്ക് കരുത്തേകുകയാണ് പോലീസ് ഉദ്യോഗസ്ഥയായ അഞ്ജു യാദവ്. "പീഡനത്തിനിരയായ അമ്മയിൽ നിന്ന് ഡി.എസ്.പി. അഞ്ജു യാദവിലേക്ക്" എന്ന കുറിപ്പോടെയാണ് അഞ്ജു തൻ്റെ അനുഭവം 'പീപ്പിൾ ഓഫ് ഇന്ത്യ' എന്ന സമൂഹമാധ്യമ പേജിലൂടെ പങ്കുവെച്ചത്.
"തകർക്കാൻ ശ്രമിച്ച ലോകം ഇപ്പോൾ എന്നെ സല്യൂട്ട് ചെയ്യുന്നു" എന്ന അഞ്ജുവിൻ്റെ വാക്കുകളിൽ അവരുടെ പോരാട്ടത്തിൻ്റെ തീവ്രതയുണ്ട്. വളരെ ചെറിയ ഒരു ഗ്രാമത്തിൽ കർഷകൻ്റെ മകളായിട്ടാണ് അഞ്ജുവിൻ്റെ ജനനം. കോളേജിൽ ഏറ്റവും ഉയർന്ന മാർക്കു നേടി വിജയിച്ച വിദ്യാർത്ഥിനിയായിരുന്നു അവർ. എന്നാൽ വീട്ടിലെ സാമ്പത്തിക ബുദ്ധിമുട്ടുകളും പ്രാരാബ്ധങ്ങളും കാരണം ഇരുപത്തിയൊന്നാം വയസ്സിൽ അവർക്ക് വിവാഹിതയാകേണ്ടി വന്നു.
വിവാഹത്തിന് തൊട്ടുമുമ്പാണ് താൻ ഭർത്താവിനെ കാണുന്നതെന്നും, അയാൾക്ക് തൊഴിലില്ലെന്നും കടുത്ത മദ്യപാനിയാണെന്നും വൈകിയാണ് തിരിച്ചറിഞ്ഞതെന്നും അഞ്ജു പറയുന്നു. പിന്നീടുള്ള ജീവിതം ഏറെ പരിതാപകരമായിരുന്നു. ഭർത്താവിൽ നിന്ന് യാതൊരു പിന്തുണയും ലഭിക്കാതെയാണ് അവർ സ്വന്തം കുഞ്ഞിനെ വളർത്തിയത്. "എന്നെ പോലെ എൻ്റെ മകൻ്റെ ജീവിതവും ഇല്ലാതാക്കാൻ ഞാൻ തയ്യാറായിരുന്നില്ല," അഞ്ജു പറയുന്നു. ഈ തിരിച്ചറിവാണ് ആ ബന്ധം ഉപേക്ഷിക്കാൻ അവരെ പ്രേരിപ്പിച്ചത്.
കുടുംബബന്ധം ഉപേക്ഷിച്ചതോടെ അഞ്ജുവിന് സമൂഹത്തിൽ നിന്ന് കടുത്ത ഒറ്റപ്പെടുത്തലും പരിഹാസങ്ങളും നേരിടേണ്ടി വന്നു. "ഭർത്താവിനെ ഉപേക്ഷിച്ചവൾക്ക് ജോലിയില്ല" എന്ന് പറഞ്ഞ് പലരും അവരെ മാറ്റിനിർത്തി. എന്നാൽ, ഈ പ്രതിസന്ധികളിൽ തളരാതെ അഞ്ജു തൻ്റെ സ്വപ്നങ്ങൾക്ക് മുകളിലേക്ക് സഞ്ചരിക്കാൻ തീരുമാനിച്ചു.
ആദ്യമായി ഒരു അധ്യാപികയായി ജോലിക്ക് കയറിയ അവർ അതിനിടയിൽ തന്നെ പോലീസ് പരീക്ഷകൾക്കായി തയ്യാറെടുക്കാൻ തുടങ്ങി. കഠിനാധ്വാനം ചെയ്ത അവർക്ക് അതിൻ്റെ ഫലവും ലഭിച്ചു. എന്നാൽ, ഈ സമയത്തും ഭർത്താവ് ജോലി സ്ഥലത്തെത്തി പ്രശ്നങ്ങളുണ്ടാക്കി. ഇങ്ങനെ പത്ത് വർഷം നീണ്ട പോരാട്ടത്തിനൊടുവിലാണ് അഞ്ജു യാദവ് ഡി.എസ്.പി. പദവിയിലേക്ക് എത്തുന്നത്.
"നിശബ്ദയായിരുന്ന വീട്ടിൽ നിന്ന് ഇന്ന് ഞാൻ ഉത്തരവിടാൻ പ്രാപ്തയായിരിക്കുന്നു," എന്ന് അഭിമാനത്തോടെ അഞ്ജു പറയുന്നു. തൻ്റെ യൂണിഫോമിനെ ബഹുമാനിക്കുന്നതായും, എപ്പോഴാണോ ഒരു സ്ത്രീ സ്വന്തം ജീവിതം തിരുത്തിയെഴുതാൻ തീരുമാനിക്കുന്നത്, അപ്പോൾ അവളെ തടയാൻ ആർക്കും കഴിയില്ലെന്നും അഞ്ജു യാദവ് ഓർമ്മിപ്പിക്കുന്നു. പ്രതിസന്ധികളെ അതിജീവിച്ച് വിജയം കൈവരിക്കുന്ന ഓരോ സ്ത്രീക്കും അഞ്ജു യാദവിൻ്റെ ജീവിതകഥ ഒരു വലിയ പ്രചോദനമാണ്.